Abu Sayyaf sa Bohol

CEBU, Philippines - Siyam ang kompirmadong patay samtang usa ka polis ang nasamdan sa nahitabong engkwentro batok sa mga armadong gidudahang sakop sa Abu Sayyaf Group sa Inabanga, Bohol kagahapon.

Sayo kagahapon sa buntag milarga padung sa Bohol si Police Regional Office-7 Director Chief Supt. Noli Taliño aron pagsusi sa sitwasyon.

Ang Bohol nangandam sa umaabot nga ASEAN Meet nga pagahimuon sunod semana.

Ang engkwentro nahitabo duol sa Inabanga River sa Barangay Napo sa maong lungsod. Sa maong suba gikatahong nisulod ang gibanabanang napulo ka armadong tawo luwan sa tulo ka pumpboats sa miaging gabii.

Sumala pa sa press statement ni Chief Supt. Noli Taliño sa Police Regional Office -7 ug ni Lt. Gen. Oscar Lactao sa Central Command, ilang gipasalamatan ang mga tawo pagdepensa sa ilang komunidad pinaagi sa pagpahibalo dayon sa mga otoridad.

Apan usa ka polis, tulo ka sundalo ang nakalas samtang lima usab ka bandido ang kompirmadong patay.

Wala pa giila kun si kinsa ang mga nakalas sa habig sa gobiyerno hangtud nga di mapahibalo ang ilang mga pamilya, samtang walay nakaila sa mga nakalas nga mga bandido.

Apan sa report sa GMA News.Tv kagabii, ang mga nakalas  nga tropa sa gobiyerno mao sila si 2nd Lt. Estilito Saldua Jr., Cpl. Miljune Cajaban, Sgt. John Dexter Duero, ug PO2 Rey Anthony Nazareno ug adunay usa ka polis nga naangol.

“Four of our brave troops, however, made the supreme sacrifice of giving their lives during the course of this operation. Their heroism will forever be engraved in the hearts of our people,”  matud pa sa pamahayag nga nadawat sa Banat News.

Adunay narekober nga mga armas ang otoridad nga gilangkoban sa tulo ka M16 Armalite Rifles ug usa ka M14 Rifle gikan sa encounter site.

Tungod sa engkwentro, nangalisang ang malinawong mga residente ug gimando dayon ni Mayor Josephine Socorro Jumamoy ang paghiklin sa mga nagpuyo  gikan sa upat ka barangay ngadto sa mas luwas nga lugar.

Ang DSWD-7 sa Bohol mipadala na og 150 ka mga family food packs alang sa mga pamilyang namakwit.

Nagabot-abot ang pwersa sa kapolisan sa Bohol Provincial Police Office , Regional Public Safety Battalion ug 47th Infantry Battalion sa Philippine Army aron suportahan ang Inabanga Police Station.

Si Col. Medel Aguilar, ang Assistant Chief sa Unified Command Staff sa Civil Military Operations sa Central Command mibutyag nga padayon ang airstrike sa lugar.

Matud pa niya, kadtong nahibiling buhi nga mga bandido nakatago og pabor nga pwesto hinungdan nga nigamit sila sa mga air assets sa Philippine Air Force samtang ang Philippine Navy nagbantay usab sa kadagatan aron dili sila makaipsot.

Matud pa niya, ilang pugngan ang grupo nga makatapon sa mga kasikbit nga mga lugar maong gi-cordon gyud ang dapit diin sila gituohang nababoy.

Samtang ang public information officer sa PRO-7 Sr. Insp. Reslyn Abella mibutyag nga way natala nga nasamdan o napagan nga sibilyan sa maong engkwentro.

Daan nang adunay impormasyon ang AFP ug ang PNP kabahin sa mga bandido gikan sa Mindanao nga nagpadung na nganhi sa Central Visayas ug ang Bohol ug Cebu maoy gituohang ilang rumbo.

Si Senior Police Officer 4 Tito Tradio sa Inabanga Police Station kagahapon sa sayo nga nakahinabi sa Banat News mibutyag nga niadto pang Lunes sa gabii sila nakadawat og impormasyon may kalabutan sa mga armadong lalaki nga luwan og ‘kumpit’ gikan sa Mindanao nga nangabot sa maong barangay.

Sumala pa ni Tradio dali nila kining gipasusi sa ilang asset ug ilang nakita ang  giangkoraheng mga kumpit duol sa usa ka panimalay sa Barangay Napo hinungdan nga ilang gipahibalo ang Bohol Provincial Intelligence Branch.

Kagahapon sa kaadlawon, giadto kini sa mga operatiba apan nisangpot kini sa engkwentro.  - /EIM) (BANAT NEWS)