Seguridad sa CSBT mas pahugtan

CEBU, Philippines - Sugod karong Lunes, dugang blue guards, civil security unit ug kapolisan ang ipakatap sa Cebu South Bus  Terminal (CSBT) isip pagpangandam alang sa liboan ka mga pasahero nga modagsa aron mamauli sa ilang tagsa-tagsa ka mga lungsod ug probinsiya karong Semana Santa.

Lakip sa gihangyo sa pamunuan sa CSBT mao ang pagbutang og bomb disposal team, sniffing dogs ug pipila ka        sakop sa Philippine    Drug  Enforcement Agency.

Gipanglantawan karon sa mga nagdumala sa CSBT nga modagsa ang pasahero sugod sa adlaw’ng Martes hangtod Huwebes, hinungdan nga giandam na usab nila karon ang mga lingkuranan ug tent sa likud nga bahin sa waiting lounge.

Matud ni Jonathan Tumulak, ang pangulo sa Security Management sa CSBT, nga bisan sa kadaghan sa pasahero, ila gihapon hatagan og prayoridad kadtong mga senior citizen, Person with Disabilities ug mabdos nga unang makasakay sa bus.

Gipaniguro sab ni Tumulak nga hugot ang ilang ipatuman nga closed-door policy sa mga bus nga padung na mobiyahe aron pagsiguro nga dili na makakuha og pasahero gawas sa terminal aron malikayan ang overloading.

Gipahinumduman sab sa CSBT management ang mga pasahero nga bisan sa kadaghang gipatuman nga security measures, lakip na sa mga CCTV, gikinahanglan nga mismo sila magmabinantayon sa ilang mga butang, diin kun mahimo dili na sila magdala ug magsul-ob og mga mahalon nga butang aron malikayan ang kawat. - /DILT) (BANAT NEWS)