Andam na sa bakasyon

CEBU, Philippines - Naghimo na kagahapon og inspeksyon ang Land Transportation Franchising and Regulatory Board-7 sa Cebu South Bus Terminal ug North Bus Terminal samtang magbutang na usab sila og Help Desk sa mga terminals sugod karong adlaw nga Martes aron moatiman sa mga problema sa mga pasahero ug transport operators nunot sa bakasyon.

Matud pa ni Rey Elnar ang Chief Transportation Development Officer sa LTFRB 7 ilang gipangita kining mga kolurom nga mga buses nga mobiyahe atol sa tingsakay sunod semana.

Gisusi usab nila ang mga dokumento sa mga mobiyaheng bus apil na ang mga drayber ug konduktor.

Samtang ang Help Desk ibutang sa duha ka dagkong terminal sa Dakbayan sa Sugbo nga mao ang CSBT ug ang North Bus Terminal sa Mandaue aron moasikaso sa mga operators nga buot mokuha og special permits aron sila makabiyahe gawas sa ilang mga rota.

Ang Help Desk sa CSBT ug CNBT abli gikan sa alas otso sa buntag hangtod na sa alas singko sa hapon, Martes hangtod Huwebes sunod semana.

Lakip usab sa ilang inspeksyunon ang mga V-Hires ug mga jeep de pasaheroan nga molabyog sa dili ilang rota.

Samtang nakigtagbo si Konsehal Dave Tumulak, Deputy Mayor for Police Matters sa Dakbayan sa Sugbo sa mga  representante sa mga Parish Security Group (PSG) ug ubang relihiyon aron hangyuon sila pagtabang sa pagbantay atol sa Semana Santa.

Gipasabot ni Tumulak nga importanteng adunay koordinasyon sa tanan kay ang seguridad sa mga manimbahay sud sa mga simbahan kaakohan man sa mga PSG.

Apil sa pangayoan og tabang ni Tumulak ang mga barangay tanod ug ang Muslim Community sa siyudad alang sa seguridad.

Si Cebu City Mayor Tomas Osmeña masaligon hinuon sa mga opisyal nga iyang gitahasan.

Sa laing bahin, preparado na usab ang Archdiocese of Cebu sa mga kalihukan sa Semana Santa lakip na usab niini ang umaabot nga pamalandong sa Pito ka Katapusang mga Pulong sa Ginoo o ang Siyete Palabras.

Si Msgr. Ruben Labajo ang team moderator sa Cebu Metropolitan Cathedral nga nahinabi sa Banat News miingon nga nahan-ay na kung kinsa ang mga mamulong nga mohatag usab og pagpasabot sa pito ka pulong ni Hesus sa wala pa kini namatay sa krus.

Sumala pa ni Labajo atol sa pito ka pulong ni kristo tukion usab ang mga nag-unang issue nga naglangkob sa kababayen-an ug uban pa ubos sa tema nga The Parish as Communion of Communities.

Awhag ni Labajo, sa tanang katawhan nga maminaw sa pito ka pulong sa Diyos direkta sa Cebu Metropolitan Cathedral ug sa mga masakiton mahimo ra sa ilang panimalay pinaagi sa pagpaminaw sa DyRF1215 ang official nga radio station sa Archdiocese of Cebu. Rowena D. Capistrano ug Decemay Padilla (BANAT NEWS)