Trucks sa illegal haulers ipaimbargo

CEBU, Philippines - Nimando si Cebu City Mayor Tomas Osmeña sa City Mining Regulatory Board sa pag-impound sa mga trucks sa mga developers nga mohimo og illegal hauling.

Kini human sa nahitabo sa Barangay Binaliw diin dunay gihimong material recovery facility apan duna’y nireklamo kay ang iyang luna gihilabtan nga walay pananghid sa tag-iya.

Ang mayor nihatag og direktiba kang Konsehal Alvin Arcilla nga maoy pangulo sa Mining Regulatory Board niadtong Miyerkules diin duna nay usa ka truck ang gidakop.

Gawas sa P2,000 nga multa, dunay bag-ong palisiya ang siyudad nga kung dunay madakpan nga truck i-impound kini sulod sa unom ka buwan.

Nagtuo sab si Osmeña nga ilegal ang operasyon sa Binaliw tungod kay ang ARN Builders nga maoy kontraktor sa MRF giingong wala pay permit gikan sa Environmental Management Bureau ug sa Mining Board alang  sa excavation sa        lugar.

Ang EMB-7 ug ang barangay nipagawas og cease and desist order aron ipahunong ang operasyon sanglit wala pa man ma-comply sa kontraktor ang mga gikinahanglang rekisitos ug tungod usab sa reklamo ni Milagros Ingles.

Subay niini si Konsehal Nida Cabrera nga maoy gitahasan sa mayor mahitungod sa environmental issue niingon nga ang City Environment and Natural Resources Office nakadawat og application gikan sa maong developer alang sa katukuran sa MRF.

Apan giklaro niini nga wala pa mohatag og approval ang siyudad tungod kay ipaubos pa man kini sa pakisusi ug gipaabot karong adlawa mobisita sila sa dapit.

Samtang dili motuo si Konsehal Joel Garganera nga ang siyudad walay kasayuran sa maong illegal operation human matud pa dunay tawo nga nagpahibawo kanila nga duna’y kasayuran ang siyudad niini.

Aron masulbad ang maong issue, gikatakda nga usa ka executive conference ang ipahigayon sa EMB, barangay, developer, Ingles ug sa mga sakop sa konseho sa siyudad karong Abril 18 sa City Hall. (BANAT NEWS)