Minimum nga pletehan ibalik sa P8.00?
CEBU, Philippines - Ang Cebu Integrated Transport Multi-Purpose Cooperative (CITRASCO) moduso sa ilang amended petition alang sa pagpasaka sa minimum fare sa PUJs karong adlawa sa buhatan sa Land Transportation Franchising and Regulatory Board-7.
Matud ni Ryan Benjamin Yu, ang general manager sa CITRASCO nga imbis P1.50 nga umento sugod alas 7 hangtud alas 9 sa buntag ug alas 5 sa hapon hangtud alas 7 sa gabii, himoon na nilang P1 sa tanang oras.
Apan ang federasyon sa laing transport group, ang bag-ong natukod nga Cebu Public Transportworkers Federation nga adunay 2 mil ka sakop, buot nga ipadayon ang P1.50 nga fare surge ug laing P1.50 nga increase sa minimum fare.
Matud ni Romeo Armamento, ang bise presidente sa maong grupo nga ila usab istudyuhan ang posibilidad nga ipa-reinstate nila sa LTFRB ang 2008 minimum fare nga P8.
Subay niini, si LTFRB-7 regional director Ahmed Cuizon miingon nga basin aduna pay laing public hearing nga ilang ipahigayon kabahin sa amended petition sa CITRASCO. (BANAT NEWS)
- Latest
