P1.50 nga fare surge gisupak
CEBU, Philippines - Supak ang pipila ka sumasakay sa P1.50 nga usbaw sa plitehan nga gitawag og fare surge nga gipangayo sa Cebu Integrated Transport Multi-Purpose Cooperative atol sa public hearing kagahapon.
Matud pa sa mga pasahero nga makalibog ang usbaw sa plitehan ug moresulta na hinoon kini sa panaglalis tali sa drayber.
Buot nila nga 50 sentabos lang ang usbaw sa plitehan sa mga jeepneys ug ipatuman sa tanan oras sukwahi sa tinguha nga sa piniling oras lang.
Base sa petisyon sa CITRASCO, buot niini nga pasakaan lang og P1.50 ang minimum fare nga P6.50 sugod sa alas 7:00 sa buntag hangtud alas 9:00 sa buntag ug sa alas 5:00 hangtud alas 7:00 sa gabii.
Nunot niini usbon sa CITRASCO ang ilang petisyon nga haum sa gusto sa mga sumasakay.
Apan matud ni Ryan Benjamin Yu, chairman sa CITRASCO, nga himoon niyang P1 ang usbaw sa plitehan sa jeepneys sa tanang oras.
Sa iyang bahin, si Greg Perez, coordinator sa militanteng grupo sa transportasyon, ang Pinagkaisang Samahan ng mga Tsuper at Operators Nationwide-Cebu, niingon nga supak sila sa P1.50 nga fare surge kay magdala lang usab kini og kagubot o lalis sa mga pasahero ug drayber. (BANAT NEWS)
- Latest
