Tabunok flyover sirad-an na sab

CEBU, Philippines - Sirad-an na sab karong Biyernes sa gabii ang flyover sa Tabunok, Dakbayan sa Talisay alang sa pagtiwas sa pag-aspalto niini.

Matud ni Almond dela Peña, pangulo sa City of Talisay-Traffic Operation Development Authority (CT-TODA), nga nitawag kaniya ang kontraktor sa maong proyekto labot sa pagpasira pagbalik sa flyover karong Biyernes sa alas 9 sa gabii hangtud sa alas 12 sa tungang gabii.

Nalangan ang pagtrabaho tungod sa sigeng uwan apan nipasalig ang kontraktor nga dili na kini magdugay basta lang maayo na ang dagan sa panahon. (BANAT NEWS)