2 ka opisyal sa PRO-7 gibalhin sa Mindanao
CEBU, Philippines - Duha ka mga opisyal sa kapolisan ug usa ka non-commissioned officer ubos sa Police Regional Office-7 ang girelibohan sa ilang pwesto ug gidestino sa Mindanao.
Kini ang gikompirmar ni Chief Supt. Noli Taliño, director sa PRO-7 human nga adunay memorandum order gikan sa Campo Crame nga kinahanglan niyang ipatuman. Si Taliño miingon nga wala kini nahibalo kung unsa ang hinungdan nganong narelibo ang maong mga polis.
“Yes, mayroong order sila na i-relieved outside PRO-7. Inaalam natin kung anong dahilan kasi may mga regular na rotation ang nangyayari at siguro, isa ito sa reason kung bakit sila na-relieve from PRO-7,” matud pa ni Taliño.
Ang director sa Bohol Provincial Police Office Director Felipe Natividad, Jr. mikompirmar sa maong impormasyon nga narelibohan sa pwesto si Superintendent Nicomedes Olaivar, hepe sa Tagbilaran City Police ug si Senior Police Officer 4 Charito Aparicio.
Si Natividad miangkon nga nasurpresa kini sa pag-relibo kang Olaivar kay ang maong opisyal maayo og record sa anti-drug operations sa Tagbilaran. Si Olaivar ug Aparicio ang pareho nga nadestino sa Tagbilaran Police Office.
Girelibohan usab si Superintendent Joel Quintero, hepe sa Regional Special Operations Group sa PRO-7. Si Olaivar gidestino sa Region 12- Socksargen (South–Central Mindanao) samtang si Aparicio ang gibalhin sa Autonomous Region in Muslim Mindanao (ARMM) samtang si Quintero ang gibalhin sab sa Region 9 o Zamboanga del Norte.
Sa pagkarelibo sa maong mga opisyal si Taliño miingon nga mangayo kini og katin-awan sa Campo Crame ilabina ni Olaivar nga maoy naghawid sa kaso sa gipatay nga abogada nga si Mia Mascariñas-Green. (BANAT NEWS)
- Latest
