Pagsira sa Tabunok flyover adunay nakasabot, adunay wala

CEBU, Philippines - Taas nga kutay sa mga sakyanan ang nasinati sa kadalanan sa Dakbayan sa Talisay human gi-aspalto sa Department of Public Works and Highways (DPWH) ang Tabunok flyover sugod niadtong Biyernes sa gabii.

Dili lang ang Natalio Bacalso Avenue ang nakasinati og bug-at nga trapik, lakip na ang dalan Sangi nga paingon sa Siyudad sa Sugbo ug ubang barangay sa Talisay.

Kasagaran sa mga motorista, nagyaw-yaw kay wala sila masayod sa pag-ayo sa flyover. Apan kadaghanan sab ang nikatawa na lang ug nisubay sa karsada nga wala’y bagutbot tungod kay nasayod na man sila sa pagsira sa flyover.

Ang pangulo sa City of Talisay-Traffic Operation Development Authority (CT-TODA) Almond Dela Peña miingon nga mahimo nang paagian ang flyover karon apan dili pa kini ang katapusan sa maong proyekto kay aduna pa’y ikaduhang hugna sa pag-ayo. Kini mao ang pag-ayum-ayom sa pundasyon sa flyover kay nangliki na.

Wala pa hinuo’y abiso ang DPWH kun kanus-a nila kini buhaton. Kahinumduman nga nipadayag ang kadagkuan sa DPWH nga dili pa nila masugdan ang pag-ayo sa pundasyon sa flyover kay wala pa naabot ang mga materyales nga gikan sa South Korea. (BANAT NEWS)