Nisuway’g suborno gipriso

CEBU, Philippines -  Nagkauban karon sa prisohan ang usa ka job order employee sa Lungsod sa Consolacion sa iyang pag-umangkon nga nadakpan sa buy-bust operation human kini giingong misuway pagsuborno sa kapolisan.

Ang nasikop sa entrapment operation mao si Giovanni Elegino Pepito, 45, taga Brgy.Cansaga sa maong lungsod.

Matud pa ni Police Officer 1 Macroe Lanurias, sa Consolacion Police Station nanawag si Pepito kang Police Officer 2 Zeusito Veloso ug nitanyag og kwarta aron paubsan ang kaso sa pag-umangkon niini nga si Jeric Abao Pepito nga nasikop niadtong adlaw nga Martes tungod sa pagpamaligya og drugas.

Gusto niya nga makapiyansa ang pag-umangkon pinaagi sa pagpaubos sa gikan ‘selling’ o pagpamaligya og drugas ‘possession’ na lang unta ang ikaso.

Sumala pa ni Lanurias, P30 mil ang iyang gitanyag maong giandam dayon ang entrapment operation sa sulod sa police station nga gipangulohan ni Deputy for Operation, Insp. Sherwin Abellare.

Dihang natunol na ang kwarta gisikop si dayon si Pepito. Ang pag-umangkon ni Pepito  nga si Jeric gipasakaan na usab og violation sa Section 5 sa RA 9165 nga way piyansa.

Samtang unom ka mga gidudahang pushers nga naglakip sa duha ka mga babaye ang nadakpan sa mga sakop sa Lapu-Lapu City Police Office sa managlahing anti-illegal drugs operations sa Brgy Basak, Brgy Marigondon, ug Brgy Suba-Basbas.

Ang mga nadakpan giila nga sila si Arlyn Sabroso Cabase, 37, Lucy Aton, 37, Kirby Aton, 27, Benjie Amante, 31, Dexter Pongasi, 26 ug Jeric Pongasi. Nakuha gikan kanila ang mga pinaketeng shabu, drug paraphernalia ug buy-bust money.

Samtang gibalhog sa detention cell sa Cordova Police Station ang usa ka Michael Terol Rapada, 40, nga nalutsan og warrant of arrest sa kaso sa drugas. Rowena Capistrano ug Romeo Limpangog (BANAT NEWS)