Lisensiya sakmiton nga way top gisupak

CEBU, Philippines - Ang mga drayber og public utility vehicles ilabi na ang mga passenger jeepneys nga nagbiyahian sa Dakbayan sa Sugbo kusganong nisupak sa gisugyot nga ordinansahon nga maghatag og gahum sa mga traffic enforcers pagsakmit sa ilang lisensiya bisan dili na mogamit og Temporary Operators Permit.

Si Atty. Glenn Capanas, nga nagrepresentar sa Airland Taxi ug apil sa niatubang sa public hearing sa Cebu City Council kagahapon, nipasabot nga ang ordinansahon nilang Konsehal Eugenio Gabuya Jr. ug Margarita Osmeña nahasupak sa Transportation and Traffic Code.

Matud ni Capanas nga ang Section 29 sa Republic Act 4136 naglatid gyud nga masakmit lang ang mga lisensiya sa mga law enforcers nga gi-deputized sa Land Transportation Office ug ang madakpang drayber isyuhan og TOP nga maoy magsilbi nga ilang lisensiya sulod sa 72-oras. Si Capanas nipasabot nga ang Section 62 sa maong balaud naglatid nga gidid-an ang mga Provincial Board, City ug Municipal Councils, sa paghimo og ordinansa nga mahasupak sa maong lagda.

Adunay nisugyot nga ang mas labing haum nga buhaton sa City Council mao ang pag-awhag sa mga kongresista ug senador nga himoan nila og kausaban ang Republic Act 4136 aron katugotan na ang mga traffic enforcers makasakmit og lisensiya sa madakpang drayber bisan wala sila’y TOP.

Supak usab sa maong ordinansahon ang presidente sa Metro Cebu Taxi Operators Association (MCTOA) nga si Richard Cabucos kay matud pa nga posibleng abusohan lang unya kini sa mga traffic enforcers ug gamiton sa pagpangwarta.

Ang representante sa grupong PISTON nipadayag og pangutana kun unsay mahitabo sa higayon nga sakmiton ang lisensiya sa drayber sa Dakbayan sa Sugbo ug mintras wala pa malukat ang iyang lisensya, madakpan na sab siya sa Siyudad sa Mandaue.

Nabalaka ang mga sakop sa PISTON nga malagmit madoble ang ilang multa kay maapil man ang pagmaneho og sakyanan nga wala nila madala ang lisensiya atol sa ilang pagkasikop.

Sila si Konsehal Osmeña ug Gabuya nakabantay nga sagad sa mga drayber dili mahadlok nga mohimo’g kalapasan sa trapiko kay ang ilang mga lisensiya dili man masakmit sa mga traffic enforcers. (BANAT NEWS)