Walo ka linog nitay-og sa Cebu
CEBU, Philippines - Walo ka linog ang nitay-og ug 30 ka mga aftershocks ang nabatyagan sa Sugbo kagahapong adlawa.
Base sa natala nga record sa Philippine Institute of Volcanology and Seismology, ang epicenter sa maong linog didto natala sa munisipyo sa Asturias pag 3:41am, 3:43am, 3:58am, 4:41am, 4:50am, 6:17am, 9:13am ug 11:20am.
Ang pinaka kusog nga magnitude natala kini nga 3.6 ug ang pinaka ubos kay 2.2 magnitude.
Matud pa ni Robinson Jorgio, seismic observer sa Phivolcs Seismic Monitoring Station tectonic ang origin sa maong linog ug kini nabatyagan sa Asturias apil na ang Metro Cebu (Mandaue City, Cebu City, Lapu-Lapu City, Talisay City), Liloan, Consolacion ug Balamban.
Wala hinuoy dakong kadaot nga gibilin ang maong linog nga kusog kaayong nabatyagan sa Asturias ug Balamban nga niabot og magnitude 3.4 ug 4.8.
Si Asturias Mayor Jose Antonio Pintor nagpahigayon og inspeksiyon sa mga buhatan sa gobiyerno, tunghaan ug mga establisamento sa lungsod.
Matud ni Mark Supatan sa Local Disaster Risk Reduction Management officer 3 sa Asturias nga walay natalang kadaot silang nakita human sa inspeksiyon.
Ang ilang gisubay mao ang Asturias Central Elementary school, Uwak Elementary School, Look Norte Elementary School ug Look Norte National high school diin dunay ginagmay nga liki nga nakita apan luwas gihapon gamiton.
Kauban sa inspeksiyon team sila si Asturias PIO officer Christian Conejo, Engineer Virgilio Camoro, Leo Aquino sa municipal local government office, PO2 Redford Tabriga sa PNP Asturias ug Rymran Pagligaran sa LDDRMO.
Samtang si Balamban Mayor Ace Stefan Binghay nideklarar og suspensiyon sa klase sa tanang lebel isip precautionary measure hangtud nga di masigurong luwas ang mga school buildings.
Si Jorgio miingon nga mas maayong wala mausa ang sagunson nga linog kay mas kusog gyud kini kun kausa ra niigo. Mitchelle Palaubsanon, Raymond Abarcas ug Rowena Capistrano (BANAT NEWS)
- Latest
