Poste nasunog, 2 balay naapil
CEBU, Philippines - Mokabat sa P60,000 ang gibilin nga danyos sa nahitabong sunog sa Sitio Panagdait, Ibabao, Cordova alas 4:30 sa hapon sa niaging adlaw.
Giingong ang kayo unang nagsugod sa poste sa kuryente nga nahimutang duol sa mga panimalay nila ni Jennivev Villanueva ug Maribel Pladjero nga naugdaw sa sunog.
Duha pa unta ka laing panimalay ang maapil sa pagkasunog apan napawong sa kabomberohan.
Demolisyon gibabagan
Gibabagan sa pipila ka sidewalk vendors ang pagpangguba sa 33 ka nahabilin nga barong-barong daplin sa dalan B. Ceniza, Sitio Ihawan, Mantuyong, Dakbayan sa Mandaue kagahapon sa buntag.
Ang mga tag-iya nipadayag nga mahitabo lang ang demolisyon kung adunay court order ug pagseguro sa ilang kahimtang tungod sa kadugay na nila sa maong lugar.
Ang mga sakop sa Crowd Dispersal Management sa Mandaue City Police Office (MCPO) nitabang sa pagpatunhay sa kahapsay ug kalinaw atol sa demolisyon. (BANAT NEWS)
- Latest
