4 ka priso nakaeskapo

CEBU, Philippines - Upat ka priso sa detention cell sa Liloan Police Station ang nakaeskapo apan tulo kanila ang nadakpan pagbalik ug gipaslak na sa prisohan samtang ang usa padayon pang gipangita.

Si Police Officer 2 Albert Comeros sa Liloan Police Station ang miila sa duha nga nakaeskapo nga mao sila si Peter John Paradillo Marquez ug Andrew  Bantilan Opon nga pulos taga Brgy. Catarman sa Lungsod sa Liloan.

Matud pa nga pipila ka mga  detinado sa nahisgotang detention cell ang mihangyo ngadto sa jailer nga si Police Officer 2 Eric Pintoy sa pagpagawas sa ilang basura sa sulod kay dili na masingo ang kabaho niini. Si PO2 Pintoy nga maoy jailer niadtong tungora miabli dayon sa pultahan apan kalit lamang kining gidasmagan sa mga priso nga nakaingon sa pagkatumba niini.

Usa sa mga priso ang daling mikuha sa armas  nga .9mm ni PO2 Pintoy ug nagdali sa pagsibat pahilayo sa maong dapit.

Maayo na lang nga nangabot ang mga kaubang polis ni Pintoy gikan nagpatrolya ug daling nigukod ug nakuptan ang duha nga wala pa hinganli sa mga polis atol ning pagsulat sa balita.

 Atol sa gihimong hot pursuit operation nadakpan pagbalik sa Brgy Cabadiangan  sa Lungsod sa Compostela kagahapon sa hapon si Opon kinsa maoy nagbitbit sa armas ni Pintoy ug narekober kini pagbalik. Samtang padayon pang gipangita si Marquez.

Nasayran nga si Opon nadakpan niadtong Oktobre  5,  2016 sa buy-  bust operation samtang si Marquez nadakpan sa susama gihapong kaso niadtong Septiyembre 14 , 2016. (BANAT NEWS)