DOH nangandam sa ASEAN Meeting
CEBU, Philippines - Nangandam na ang Department of Health alang sa umaabot nga ASEAN Meeting sunod buwan sa Sugbo.
Kini ang gibutyag ni Renan Cimafranca, ang pangulo sa Regional Epidemiology and Surveillance Unit sa DOH-7.
Matud ni Cimafranca nga unang semana sa Abril ipaubos sa Code White Alert ang mga tambalanan sa Sugbo aron maseguro nga marespondihan dayon ang mga dili matag-an nga mahitabo sa panagtigum nga tambungan sa mga lider sa Association of Southeast Asian Nations (ASEAN).
Sumala pa ni Cimafranca nga duna silay augmentation nga ipadala sa Bohol diin lima ang matag team ug lakip usab ang pag-abot sa lima ka ambulansiya gikan sa DOH central office.
Dugang ni Cimafranca nga tutukan sa DOH ang posibleng problema sa panglawas nga masinati dili lang sa mga delegado apan lakip na usab ang ubang mga awtoridad nga naglangkub sa maong kalihukan.
Gibutyag ni Cimafranca nga ilang i-monitor ang mga delegado nga posibleng dunay simtomas sa sakit gikan sa laing nasud sama sa MersCov.
Si Cimafranca nipadayag nga mopakatap og medical personnel ang DOH sa mga lugar nga adunay ipahigayon nga kalihukan sa ASEAN Meeting. (BANAT NEWS)
- Latest
