Gipapahawa sa Mananga wala pa kabalhin

CEBU, Philippines - Nilapas na lang ang saad sa mayor, wala pa gihapon nakabalhin ang mga residente sa Sitio Mananga 1, Tabunok, Dakbayan sa Talisay human sila gipapahawa sa lugar gumikan sa proyekto sa Department of Public Works and Highways.

Ang 15 ka pamilya ang unang gipaguba sa ilang panimaye tungod kay maigo sila sa pagpalig-on sa taytayan sa Mananga ug peligro kanila nga naa sa kilid sa sapa nagpuyo.

 Si Talisay City Mayor Eduardo Gullas nisaad nga sa unang semana sa buwan sa Marso ila na nga mapahiluna ang mga naapektuhang residente ingon man pipila ka pamilya sa Barangay Lagtang didto sa Sitio Cainta, Barangay Pooc.

Si Rosalie Autor, pangulo sa Local Housing Board, nibutyag nga dili pa gyud andam ang luna nga kabalhinan tungod kay aduna pa ma’y pipila ka dokumento nga ilang gilihok nga moabot pa sa unom ka buwan.

Si Autor nipasabot nga nakakita hinuon sila og temporaryong kabalhinan sa Sitio Lower, Barangay Mohon diin paigo ra sa mga pamilya nga ibalhin.

Nipapahawa ang taga DPWH sa mga namuyo sa Mananga tungod kay ilang gipalig-on ang taytayan ingon man dili sab gyud angay nga puy-an ang ubos nga bahin sa taytayan tungod kay naghatag kini og peligro sa katawhan. (BANAT NEWS)