Ani maapektuhan sa huwaw, Buhisan dam nagkahubas

CEBU, Philippines - Sumala sa Provincial Agriculturist nga posibleng maapektohan sa huwaw ang first cropping season kun ugaling moigo ang El Niño sa bulan sa Hulyo.

Matud ni Roldan Saragena nga nangandam karon sa ilang gitikad nga yuta ang mga mag-uuma sama sa pagbutang og organic fertilizers sa dili pa tamnan.  Sigon niini nga kun ugaling masinati ang El Niño sa Hulyo, maapektohan ang mga tanom nga gibana-banang anaa sa ika-40 ngadto 50 ka adlaw ang pagtubo sama sa mais.

Hinoon matud niini nga dili na makalitan ang mga mag-uuma ug nasayod na sila sa mga angay’ng buhaton sa ilang pananom panahon sa ting-init. Apan nunot niini, si Saragena miawhag gihapon sa mga mag-uuma nga magpundo og tubig ug mo-avail sa Agri-fishery insurance program sa probinsya .

Dugang niini nga andam na ang Kapitolyo sa posibleng pag-igo sa El Niño gani padayon ang ilang paghatag og plastic drums ug magpalit usab sila og assorted vegetable seeds ug mga materyales nga magamit sa pagtanom.  

Samtang nagkaanam na og hubas ang Buhisan Dam matud sa tigpamaba sa Metropolitan Cebu Water District diin niubos ang lebel sa maong dam.

Gipasabot ni Charmaine Rodriguez-Kara nga dili pa kritikal ang maong lebel sa tubig kay 9 meters man ang labing ubos niini aron makonsiderar nga kritikal. Subay niini, nagsugod na ang MCWD sa pagpahibalo sa mga residente sa Brgy Capitol Site, Cebu City nga magtigom og tubig gikan alas 12 hangtud alas 5 sa buntag aron aduna silay magamit nga tubig sa adlawan.

Dugang ni Kara nga inig ka buntag, problema gyud sa tubig kadtong nagpuyo sa elevated areas kay dili makasaka ang tubig. Le Phyllis F. Antojado ug Mitchelle L. Palaubsanon (BANAT NEWS)