Tabunok flyover di una sirad-an ugma

CEBU, Philippines - Dili na mahinayon og sirado ugmang adlawa ang Tabunok flyover kay di mosugot si Mayor Eduardo Gullas ug palitunon pa ang mga materyales sa abroad sumala pa ni Leslie Anthony Molina, ang district engineer sa Cebu Second District Engineering Office sa Department of Public Works and Highways.

Imbes nga ugmang adlawa sa Marso 31 na sugdan ang pag-ayo sa maong flyover hangtud Abril 2 sugod alas 9:00 sa gabii hangtud alas 12 sa kaadlawon diin ayuhon ang aspalto sa dalan niini.

Sa Abril 4 sugod alas 11 sa gabii hangtud sa alas 4 sa buntag sa Abril 5 mao na ang final layer sa pag- aspalto sa maong flyover. Una niini, gipahibalo nga pasirad-an sulod sa 48 ka adlaw ang Tabunok flyover sugod Marso 18 hangtud Mayo 5 ning tuiga.

Apan matud pang Molina di mosugot si Gullas kay sobra usa ka buwan nga magproblema sa traffic ang siyudad.  Samtang ang ipuli nga expansion joint gi-order pa kini sa South Korea.

Ang Tabunok flyover mao ang pinakaunang flyover sa Sugbo nga gitukod pa’g 1992. Mitchelle L. Palaubsanon ug Gabriel Bonjoc (BANAT NEWS)