Japanese hotel manager gireklamo’g rape
CEBU, Philippines - Gisikop sa mga sakop sa Criminal Investigation and Detection Group-7 ang usa ka 50 anyos nga Japanese national nga nagdumala og motel diha sa Dakbayan sa Lapu-Lapu human gireklamo nga mimolestiya sa usa ka 15 anyos nga dalagita.
Ang suspetsado giila nga si Takeshi Kon, taga Kanagawa, Japan nga 15 ka tuig na nga nagpuyo dinhi sa nasud ug maoy tagdumala sa usa ka hotel sa iyang higala nga usa usab ka Hapon.
Ang hepe sa CIDG-7, Supt. Royina Garma miingon nga ilang nahimo ang entrapment operation sa usa ka mall sa Dakbayan sa Mandaue.
Ang 15 anyos ang gikatahong gibugaw sa iyang higala nga usa sab ka minor de edad ngadto sa Hapon.
Niadtong bulan sa Pebrero gidala sa suspek sa usa ka hotel ang biktima apan wala sila pasudla kay minor de edad ang iyang kauban, maong didto niya gihimo ang krimen sa sakyanan ug gihatagan kini og usa ka libo ka pesos.
Apan nibalik og kontak ang suspetsado sa biktima kay gustong makigkita maong natigayon ang entrapment operation. Gawas sa 15 anyos daghan pang nabiktima ang Hapon nga gipangita karon sa CIDG-7.
Gawas sa kasong rape, pasakaan sab og kaso ang suspetsado nga paglapas sa Sec. 6 sa RA 7610 (attempt to commit child prostitution) o Special Protection of Children against Abuse, Exploitation and Discrimination Act.
Ang suspetsado wala motingog dihang sulay unta nga gikuhaan og pamahayag. (BANAT NEWS)
- Latest
