Lupon nihangyo i-release ang P1M

CEBU, Philippines - Nagpadala og suwat ang Office of the League of Lupong Tagapamayapa sa Kagamhanan sa Siyudad sa Sugbo aron hangyuon nga ihatag na ang financial assistance nga P1 million nga gipugngan paghatag kay gusto pang susihon sa mayor kun nitrabaho ba ang mga sakop sa Lupon sa mga barangay.

Ang Executive Assistant to the Mayor nga si Bimbo Fernandez mipasabot nga gusto lang gyud sa mayor kun nitrabaho ba gyud ang mga Lupon sa siyudad sa dili pa niini i-release ang pundo. Ang Lupon miduso na og mga dokumento nga magpamatuod nga sila mitrabaho gyud.

Giangkon ni Fernandez nga dako og tabang ang mga Lupon Tagapamayapa kay sila maoy mohusay sa mga kasungian sa barangay aron di na moabot sa korte. Mipasalig si Fernandez nga iyang ihatag sa mayor ini og abot niini gikan sa abroad ang suwat ug mga suportang dokumento sa Lupon aron i-release sa mayor ang maong pundo.

Nasayran sa 80 ka barangay sa siyudad 33 pa lang ang niduso og accomplishment report gikan sa buwan sa Enero hangtod na sa Disyembre sa miaging tuig.

Nasuta nga gawas sa pagpa-release sa financial assistance nanghangyo usab ang Lupon nga umentohan ang ilang allowance gikan sa P4,000 ngadto na sa P6,000. (BANAT NEWS)