5-anyos napusilan patay
CEBU, Philippines - Singko anyos nga batang lalaki ang patay human napagan sa pagpusil sa dihang gibirahan ang iyang amahan sa ilang silingan didto sa ilang panimay sa Brgy San Roque, Dakbayan sa Talisay niadtong Lunes sa gabii.
Ang namatay mao si Jerwin Mariano, 5 anyos samtang samdan ang iyang amahan nga si Edwin Mariano, 36, nagpuyo sa nahisgutang lugar. Ang suspek nailhan nga si Alain Bowon, 44.
Si Senior Police Officer 2 Yvonne Ilustrisimo sa Talisay City Police Station nibutyag nga padung matulog ang mga biktima sa dihang kalit nga naabot ang suspek nga hubog.
Ang suspek nangutana pa ni Edwin kun siya ba si “King” apan kalit lang nibunot kini sa iyang armas dayun pusil katulo ka higayon. Naigo sa iyang tuo nga paa si Edwin apan ang iyang anak nga si Jerwin ang naigo sa iyang tiyan. Nisibat ang suspek samtang gidali ug dala sa tambalanan ang mga biktima, apan namatay gyud ang bata.
Nagduda ang polis nga rebolber ang gigamit sa suspek kay way basiyo silang nakuha sa crime scene.
Si Edwin nitumbok kang Bowon nga ilang silingan nga taxi drayber ang nagpusil kanila hinungdan nga giadto kini sa balay niini ug ilang gidakop.
Matud ni Ilustrisimo nitug-an nga nasaypan gyud si Edwin sa suspek nga nangita sa usa ka ginganlan og King nga giingong usa ka “kawatan” nga magkatulganan sa panimay ni Edwin. (BANAT NEWS)
- Latest
