Ipatuman sa Sugbo ang enhanced NGP

CEBU, Philippines - Sobra sa 50 ka people’s organization sa Probinsya sa Sugbo ang mamahimong mopasiugda sa pag-implementar sa programa sa gobiyerno nga gitawag og National Greening Program, nga gihimong komprehensibo sa bag-ong administrasyon. Napasiugdahan sa miaging administrasyon ang massive forest rehabilitation program diin gipalambo ug gihimo isip agro-forestry.

Matud sa pangulo sa Provincial Environment and Natural Resources Office Cebu nga si Jose Cleo Cary Colis, ang maong mga rehistradong organisasyon misulod og 25-year agreement tali sa DENR aron sa pagdumala sa ilang kaugalingong forest and timber lands. Ubos sa maong kontrata, ang maong mga people’s organization adunay obligasyon sa pagbantay sa maong kalasangan ug protektahan ang resources niini. Igo sab nga matuman nila kini kay gihatagan usab sila og higayon nga mamahimong gamiton ang forest products ngadto sa commercial enterprise apan ipaubos sa supervision ug regulasyon sa DENR.

Usa sa mga gipalambo nga barangay-based projects sa miaging katuigan mao ang coffee plantation sa Lungsod sa Tuburan. Karong tuiga, ang PENRO nagtinguha sa kawayan nga mahimong priority commodity kay dali kining motubo ug dako usab kini og tabang sa pag-mitigate sa climate change. Mahimo sab kining iproseso sa nagkadaiyang mga furniture products. Matud ni Colis, mibubo ang gobiyerno og dili mominus sa P50 milyones karong tuiga alang sa Sugbo aron sa pagsustiner sa enhanced NGP. Si Colis mibutyag nga dagkong hagit nila karon  ang kakulang sa people’s organization. Mao nga miawhag siya sa mga kadagkuan sa kabarangayan nga moestablisar og organisasyon aron makabenepisyo sa maong programa. - /DILT) (BANAT NEWS)