P20M shabu nasakmit

CEBU, Philippines - Lima ka kilong gidudahang shabu ang nasakmit sa mga sakop sa Philippine Drug Enforcement Agency-7 gikan sa usa ka 27 anyos nga lalaki nga gitumbok nga leader sa usa ka drug group diha sa Deca Homes, Brgy. Dumlog, Dakbayan sa Talisay kagahapon sa buntag.

Giila ang suspetsado nga si Marwin Abelgas, nagpuyo sa maong dapit ug gitumbok nga leader sa Abelgas Drug Group nga naglihok dinhi sa Central Visayas.

Gawas ni Abelgas, laing upat ka mga tawo ang nadakpan nga sila si Kate Estrera, 23, Juvan Torres, 28, Wyett Arceo, 19, ug Daphni Rose Flores, 26.

Ang director sa PDEA-7 Felimon Yogi Ruiz nga nahinabi sa mga tigbalita nagkanayon nga usa ka bulan nilang gipanid-an ang grupo.  Nadakpan si Abelgas sulod sa iyang balay. Gitug-an ni Ruiz nga uyoan ni Abelgas si Roland Abelgas ang namatay usab nga kauban ni Jeffrey Diaz alyas Jaguar atol sa pagkapatay niini didto sa kaulohan.

Gamit ang P400 mil nga buy-bust money nakapalit og 100 gramos nga shabu ang asset sa PDEA-7 hinungdan nga kini ilang gisikop.

Nakuha sa mga operatiba gikan ni Abelgas ang napulo ka dagko nga putos sa gituohang shabu nga mitimbang sa lima ka kilo nga mokantidad og P20.4 Milyones.

Sumala pa ni Ruiz si Abelgas na ang mipuli sa mga dapit nga kaniadto kontrolado sa napatay nga si Jaguar ug ang mga suppliers ni Jaguar didto na sab kaniya mohatag.

Nagtuo si Ruiz nga maglisod na sa pagsulod dinhi sa Sugbo ang mga dagkong shabu suppliers tungod sa pagkasikop ni Abelgas.

 “Listed siya as drug group leader… I don’t think he’s a new player, medyo idlas lang ni siya but kining ilang grupo sa una pa tie up nani sila with the grupo ni Jaguar,” matud pa ni Ruiz.

Matud pa ni Ruiz, priority target si Abelgas kay “major distributor” kini sa drugas kay makabaligya kini og lima ka kilo kada semana.

Dugang ni Ruiz nga ilang nahibaw-an ang kalihokan ni Abelgas tungod gihapon sa mga nauna na nilang nangadakpang drug pushers kay sila maoy nihatag og impormasyon bahin niini.

Ning bag-ohay lamang namahayag si Pres. Rodrigo Duterte nga ang Sugbo maoy numero uno sa kinadak-ang konsumo sa ilegal nga drugas sa nasud.

Apan si Abelgas nga nahinabi sa mga tigbalita mihimakak nga iyaha ang nakuha nga shabu apan miangkon nga namaligya kini og shabu apan ginagmay ra.

Sigun ni Abelgas upat ka tuig siya nga napriso kaniadto gumikan sa kaso sa drugas apan kini nakagawas human na-dismiss ang kaso.

“Nakita naman ninyo the government is serious in this campaign, karong panahona wala na’y na-considered as untouchable…. Undang na lang mo, kung di mo-moundang pamalhin mo og laing lugar, pamalhin mo laing region ayaw mo diri Region 7 kay madakpan gyud mo,” bahad pa ni Ruiz. (BANAT NEWS)