Dugang PDEA-7 offices tukoron

CEBU, Philippines - Plano karon nga tukuron sa Philippine Drug Enforcement Agency -7 ang lima ka district offices sa rehiyon karong buwana.

Matud ni PDEA-7 Director Filemon Yogi Ruiz nga ang maong plano gikan sa ulohang buhatan isip pagpalapad sa ahensiya tibuok nasud aron mas daghan pa ang mahimo nga anti-drug operations.

Sumala pa ni Ruiz nga prayoridad nila nga butangan sa mga district offices mao ang mga “highly urbanized cities” sama sa Dakbayan sa Sugbo, Lapu-Lapu, Mandaue ug Talisay.

Ang lima ka district offices kabahin kini sa 100 nga tukuron sa 18 ka rehiyon sa nasud.

Gipahibawo sab ni Ruiz nga moabot na sab karong buwana ang 400 ka bag-ong graduate nga mga agents gikan sa PDEA Academy nga gibansay-bansay sulod sa unom ka buwan.

Masaligon si Ruiz nga andam na ang maong mga graduates sa gubat batok drugas kung sila ipakatap na sa nagkalain-laing dapit.

Samtang gihangop sab ni Ruiz ang pagbalik na sa kapolisan sa kampanya kontra drugas aron mas paspas ug daghan pa unya nga drug pushers ang mahulog sa kamot sa balaud tungod kay madugangan na man sab ang ilang pwersa.

Giklaro ni Ruiz nga sa matag operasyon nga himoon sa kapolisan, gawas nga makig-alayon sila sa PDEA kinahanglan sab nga dunay usa nila ka agent nga mouban base sa memorandum nga gipagawas gikan sa ulohan nila nga buhatan. (BANAT NEWS)