Garbage trucks sa Talisay nangaguba

CEBU, Philippines - Hangtud karon wala gihapo’y kausaban ang pagpangolekta sa basura sa Siyudad sa Talisay.

Kini gumikan sa mga garbage trucks nga wala nagamit bisan pa man sa mga reklamo sa katawhan.

Si Konsehal Manuel Cabriana ang nipasar og resolusyon aron sa pag-imbentaryo sa mga garbage trucks nga magamit ug dili na magamit.

Kini human si Edwin Nierves nga maoy Solid Waste Management Officer ang nangayo na og pakitabang kaniya.

 Siya nagkanayon nga naa na lang sa tulo ngadto sa upat ka garbage trucks ang gigamit sa pagkakaron alang sa 22 ka barangay sa Talisay samtang ang lima ngadto sa unom niini ang pulos guba ug hangtud karon wala pa gyud maayo sa motorpool.

Gani gidasonan kini ni Joan Vebar, pangulo sa General Services Office (GSO) kinsa nibutyag nga aduna sila’y gipadala nga endorsement sa Commission on Audit (COA) aron ipang-dispatsar na ang pipila ka garbage trucks kay dili na gyud kini maayo pa.

Samtang nihangyo sab si Cabriana nga unta magahinan og pundo ni Mayor Eduardo Gullas sa pagpalit og deodorizer truck para sa mga basura nga dili kaayo nga mobaho ilabi na sa mga basura sa merkado ingon man sa ihawan.

Ang iyang resolusyon ang giaprubahan sa iyang kaubanan kagahapong adlawa. (BANAT NEWS)