Diarrhea out-break sa Carnaza

CEBU, Philippines - Nideklarar na ang Department of Health og outbreak sa suka ug kalibanga sa isla sa Barangay Carnaza, Lungsod sa Daanbantayan human niabot na sa 101 ang kaso sa mga tawo nga biktima.

Matud ni Dr. Rene Catan, pangulo sa Provincial Health Office, nga 14 niini ang na-admit sa district hospital sa lungsod.

Gikan sa edad nga 4-anyos ngadto sa 70 anyos ang mga biktima apan kasagaran anaa sa 20-anyos ang pangedaron.

Ang pagsuka-kalibang sa mga tawo tungod kini sa hugaw nga tinubdan sa tubig base sa pagsusi sa Regional Epidemiology and Surveillance Unit diin ang walo ka atabay nagpositibo sa E-coli, bacteria nga gikan sa hugaw sa hayop o tawo.

Si DOH-7 Director Jaime Bernadas ang nideklarar og outbreak base sa report ni RESU-7 chief Renan Cimafranca.

Si Catan nagkanayon nga ang gihimo sa mga tawo didto nagkuha og tubig sa Probinsiya sa Leyte nga duol ang maong isla apan kontaminado gihapon.

Matud ni Catan nga nagpadala na sila og tambal lakip na sa kits alang sa monitoring sa mga naapektohan nga residente. Sa pagkakaron, matud niya nga gidid-an na ang mga tawo sa isla nga mokuha pa og tubig sa atabay ug magkuha na lang sa laing tinubdan sa mainland.

Si Catan nagkanayon nga ang kaso sa suka-kalibang dili na kini bag-o sa Lalawigan sa Sugbo sanglit daghan na ang nangagi nga kaso sa pipila ka mga lungsod ug dakbayan. Ang water system maoy usa sa gitumbok ni Catan nga problema karon sa probinsya nga angay sulbaron. (BANAT NEWS)