10 balay ugdaw sud sa 24 oras

CEBU, Philippines - Naugdaw ang napulo ka panimalay sa duha ka sunog nga niigo sa managlahi nga lugar sa Dakbayan sa Sugbo sulod lang sa 24-oras.

Unang sunog nahitabo alas 7:53 niadtong Lunes sa gabii sa may All Season Highway Tagunol, Basak Pardo, diin lima ka panimalay ang hingpit nga naugdaw. Matud ni Senior Fire Officer 4 Rogelio Valencia nga naglisud gyud sila sa pag-penetrate sa sunog tungod kay moagi pa og mga sapa hinungdan nga nikatkat na lang sa mga atop ang kabomberohan aron makapasirit.

Sumala pa ni Valencia nga nagsugod ang sunog sa panimalay ni Elvira Binarao apan wala kini sa iyang panimalay atol sa pag-ulbo sa kayo tungod kay adunay gipanabtan.

Dugang ni Valencia nga mopahigayon pa sila og imbestigasyon ilabi na sa giingong dunay wiretapping sa lugar.

Samtang kagahapon sa alas 12:03 sa udto laing sunog ang nitumaw sa may dalan V.Rama, Guadalupe. Matud ni Fire Investigator Emiliano Daño nga unom ka 6 ka panimalay ang apektado diin upat niini ang hingpit nga naugdaw ug gibana-bana nga mokabat sa P75 mil ang danyos.

Alas 12:16 nakontrolar ang sunog ug hingpit nga na-fire out alas 12:41.

Gibutyag ni Daño nga ilang ipatawag ang tag-iya sa balay diin nagsugod ang sunog nga sila si Jeck Hubahib ug Mary Grace Nabua.

Sa laing bahin makabalik na sa ilang gipuy-an nga luna ang mga biktima sa sunog sa Barangay Guizo ug Mantuyong sa Dakbayan sa Mandaue kinsa temporaryong anaa sa compound sa Cebu International Convention Center.

Si Mayor Gabriel Luis “Luigi” Quisumbing niingon nga kompleto na ang pag-abuno sa luna nga kanhi gipuy-an sa mga nasunugan sa niaging tuig.

Giparipa ang luna ug 300 lang ka pamilya ang makabalik sa pagtukod sa ilang panimalay sa gidak-on nga 28 metro kwadrado.

Ang nahabilin nga 400 adto ipahimutang sa luna sa Dakbayan sa Lapu-Lapu nga paliton sa kagamhanan isip relocation site. Rowena D. Capistrano ug Romeo T. Limpangog (BANAT NEWS)