4 patay sa diarrhea sa Toledo

CEBU, Philippines - Niabot na sa upat ka tawo ang nakalas sa sakit nga diarrhea sa dakbayan sa Toledo sulod sa buwan sa Enero.

Ang mga namatay gikan sa barangay Luray Dos, General Climaco, Sagay ug Matab-ang.

Duha sa mga biktima mga bata samtang ang laing duha hingkod na ang pangedaron.

Subay niini nangapud-apod ang City Health Office og sodium hydrochloride ngadto na sa mga residente sa kabarangayan nga apektado sa sakit nga diarrhea. Matud ni Antonio Layan, sanitary inspector, nga ang maong chemical isagol sa tubig nga mainom aron mamatay ang kagaw.

Pahimangno sab sa City Health Office nga kinahanglan nga seguraduhon nga limpyo ang ilimnon nga tubig ug dili sab magpataka og kaon sa mga pagkaon nga mapalit kung dili segurado ang kalimpyo niini. - /GMR) (BANAT NEWS)