Villarante, Caballero gipasanginlan ni Emit

CEBU, Philippines - Mihangyo kang Talisay City Councilor Doroteo Emit ang duha ka kanhi opisyal sa maong siyudad nga dili lang unta sila amungon sa iyang palpak human kini miingon nga nasagulan sa politika ang mga isyu sa Federation of Talisay City Urban Dwellers Association (FETCUDA).

 Matud ni kanhi bise mayor Romeo Villarante nga maka-paranoid ang sobrang ambisyon sa politika nga gitumong ngadto kang Konsehal Emit.

 Samtang si kanhi Konsehal Danny Caballero niingon nga unta dili mangamong si Emit sa iyang palpak nga nahimo.

Sa nasayran, si Emit gihulagway sa mga sakop sa FETCUDA nga maoy nagdala og kasamok sa ilang grupo human ang representanti sa Presidential Commission on Urban Poor (PCUP) nga si Ma. Llura Layun, gipalagpot sa Talisay pinaagi sa resolusyon sa konseho. Si Emit maoy gipasanginlan sa maong grupo nga maoy nangulo sa pagpalagpot ni Layun.

 Gani nipasar og resolusyon ang FETCUDA sa paghangyo sa konseho pinanguluhan ni Bise Mayor Alan Bucao nga tangtangan si Emit sa chairmanship sa urban poor.

 Apan si Emit nipasabot nga ang iyang lihok, gisuportahan kini sa iyang mga kaubanan. Gani nisuporta sab kaniya si Mayor Eduardo Gullas sa desisyon sa konseho tungod sa ilang wala nay pagsalig kang Layun.

 Si Villarante nitataw nga dili sila angay pasanginlan ni Emit sa lihok sa urban poor kay ang maong grupo dili magawngan kay aduna silay mga integridad ilabi na ang ilang mga lider.

 Asoy pa niya nga ang gihimo ni Emit maoy resulta sa iyang gihimo ngadto sa pederasyon ug dili na kinahanglan pa nga mamasangil sa uban sa palpak nga iyang nahimo.

 Nagduda si Villarante nga gihimuan lang og “scenario” si Emit sa iyang mga kauban nga konsehal.

 Si Emit nibutyag nga makaduda ug makaingon gyud siya nga pamulitika kay ang plastada nga nagdala sa mga tawo mao man ang mga sakop ni Villarante ug ni Caballero.

 Apan si Caballero sa iyang bahin nagkanayon nga usa sa mga sakop sa FETCUDA ang iyang kanhi staff apan wala kini magpasabot nga siya maoy nagsugo niini kay nagpakahilom na man siya human siya napildi sa eleksyon.

 Asoy pa niya nga ang labing maayo nga buhaton ni Emit mao ang pagsulbad sa iyang problema ug dili mamasangil sa ubang tawo nga nagpakahilom. (BANAT NEWS)