Del Mar supak skywalk kuhaan sa atop

CEBU, Philippines - Dakong supak si Kongresista Raul del Mar nga kuhaan og atop ang mga skywalk sa Dakbayan sa Sugbo kay dili kini maoy tukma nga paagi aron wala na’y mga libud-suroy nga kabataan ug mga makililimos nga moestar ilabi na sa kagabhion.

Si del Mar maoy nagpagahin og pundo gikan sa iyang Priority Development Assistance Fund (PDAF) aron matukod ang kapin sa 10 ka skywalks sa lainlaing dapit sa north district sa dakbayan.

Matag skywalk gigastohan og P4 milyones ug gitumong kini aron makatabang pagsulbad sa trapiko kay anha na man paagion ang mga tawo nga molabang sa karsada ug dili na mabalda ang dagan sa mga sakyanan.

Si Lea Japson, pangulo sa Department of Social Welfare and Services (DSWS) sa dakbayan, maoy nisugyot nga usa sa paagi nga dili na moestar ang mga libud-suroy ug mga makililimos mao ang pagkuha sa atop.

Gihimo ni Japson ang sugyot tungod kay daghan ang nireklamo nga ang mga tawo mahadlok na moagi sa skywalk ilabi na sa gabii kay daghang mga libud-suroy nga mga batan-on nga posibleng mohilabot kanila.

Matud ni del Mar nga ang pagbutang og atop sa skywalk iyang gituyo aron nga kadtong mga moagi dili mainitan panahon sa adlaw ug dili sab mabasa kun mag-uwan.

Ang sugyot ni del Mar mao nga ang mga tanod sa mga barangay diin adunay skywalk kinahanglang idestino sa pagpatrolya aron walay mga libud-suroy ug mga makililimos nga anha moestar.

Gusto gani ni del Mar nga ang mga opisyal sa barangay istrikto gayud nga mopatuman nga ang mga tawo mogamit sa skywalk sa ilang paglabang sa karsada. Usa ka magtutudlo sa Banilad Elementary School nadam-agan og sakyanan mismo sa City Hall sa niaging tuig kay nilabang kini sa karsada nga wala moagi sa skywalk. (BANAT NEWS)