Kabalaka vs powerplant gikonsiderar usab-Daluz

CEBU, Philippines - Mihangyo ang mga residente sa Brgy Sawang Calero sa Dakbayan sa Sugbo ngadto sa Konseho sa syudad nga i-reconsider ang ilang posisyon pagduso sa pagtukod sa coal fired power plant diha sa ilang         barangay.

Samtang ang kaparian sa Sugbo usab mipadayag sa ilang pagsupak sa maong proyekto tungod sa kabalaka nga makaguba kini sa kalikopan dala sa polusyong ibugwak sa mga panghaw niini.

Kagahapon nagprotesta ang mga residente tungod sa pag-revive sa project nga una nang gibasura sa nangaging konseho sa siyudad.

Apan giklaro ni Konsehal Jose Daluz III nga mag-eskedyul pa og public hearing ang Konseho kun makadawat na kini og aplikasyon gikan sa Ludo and Luym Coal Power Plant.

Ang maong public hearing, matud ni Daluz nga kinahanglan buhaton aron madungog sa konseho ang tingog sa mga residente.

Aduna say laing public hearing ang ipahigayon sa Department of Environment and Natural Resources kun mangaplay na ang Ludo og Environmental Compliance Certificate alang sa proyekto.

Gani, matud ni Daluz nga wala pa naaprobahan sa konseho ang maong project ug giduso ra kini ngadto sa DENR.

Gihangyo ni Daluz ang mga residente ug mga grupo nga supak sa project nga sabton ug tun-an pag-ayo kini tungod dako kini’g matabang sa siyudad ilabi na P27 billion kini nga investment umaabot ang krisis sa kuryente sa siyudad  tungod sa nagkadaghang namuyo na dinhi.

Si Brother Jaazeal Jakosalem, OAR miingon nga dakong supak ang simbahan sa pagtukod sa maong planta dungan sa pagkutlo sa gipamulong ni Santo Papa Francisco niadtong tuig 2015 nga nag-awhag sa tanan nga ampingan ang kalikopan.

Partikular niini ang pagpahunong sa mga planta nga mogamit og fossil fuel kay tinubdan kini sa polusyon.

Samtang pagbarog usab kini sa simbahan sa tema sa kapistahan sa Senyor Sto. Niño karong tuiga nga mao ang pagmahal sa kalikopan. (Jean Marvette Demecillo ug May Miasco (BANAT NEWS)