Skywalk pakuhaan og atop
CEBU, Philippines - Uyon si Cebu City Mayor Tomas Osmeña sa sugyot nga kuhaan og atop ang mga skywalk aron dili na ganahan ang mga libud-suroy nga mangatulog ilabi na sa gabii.
Apan sila si Bise Mayor Edgardo Labella ug Konsehal Dave Tumulak niingon nga mas labing maayo nga himoan una og dugang pagtuon ang sugyot ni Lea Japson, ang pangulo sa Department of Social Welfare and Services (DSWS) sa dakbayan.
Si Japson nisugyot niini tungod sa problema nga wala gyud mabadlong ang mga tawo nga anha magkatulganan ug maghugaw-hugaw pa sa skywalk.
Ang Dakbayan sa Sugbo adunay 16 ka skywalk nga gipatukod nila ni Kongresista Raul del Mar ug ni kanhi kongresista Antonio Cuenco pinaagi sa ilang Priority Development Assistance Fund (PDAF) kaniadto.
Matag skywalk gigastuhan og P4 milyones tumong nga maibanan ang problema sa trapiko ug luwas nga pagtabok sa katawhan sa karsada. Apan ang uban niining maong mga skywalk gihimo na lang nga katulganan sa mga libud-suroy ilabi na kadtong nahimutang duol sa Fuente Osmeña Rotunda diin ang uban anha ra sab mangihi.
Sila si Labella ug Tumulak niingon nga kun kuhaan sa atop ang skywalk makapasamot kini nga wala nay ganahan nga moagi ilabi na kun mag-uwan ug molakaw na lang gyud hinoon sila sa karsada.
Matud ni Tumulak nga ang atop sa skywalk makahatag og dugang katahum sa pasilidad mao nga dili angay’ng dali-dalion ang pagtangtang.
Si Osmeña hinoon niingon nga mahimong estoryahan nila kini pag-ayo ang maong isyu apan matud niya nga kung kuhaan og atop ang skywalk mahimo man nga ang mga molabang panahon sa uwan magdala og payong. (BANAT NEWS)
- Latest
