Garcia nanganti Gica di na kabalik
CEBU, Philippines - Nanganti si kanhi Dumanjug mayor Nelson Gamaliel Garcia nga dili na makabalik sa katungdanan ang kasamtangang mayor nga si Efren Guntrano Gica tungod kay 30 ka kasong graft pa ang gikatakdang ipasaka niya.
Si Garcia nibutyag nga upat ka kaso pa nga iyang giduso batok kang Gica ang naglinya ug ang maong mga kaso paingon pang desisyonan sa Ombudsman.
Gikatakda na usab nga mopasaka si Garcia og laing 30 ka kasong malversation batok kang Gica ngadto sa Ombudsman.
Matud ni Garcia nga ang gihimong pagduso ni Gica og Motion for Reconsideration (MR) nagpakita nga desperado na kini tungod kay nasakpan na kini sa iyang pagpamakak ug namakak lang gihapon.
Dugang ni Garcia nga si Gica dili na makalingkod og balik sa posisyon ug posibleng mapriso pa kini.
Si Gica ang gimanduan na sa Ombudsman nga matangtang sa katungdanan ug nagpaabot na lang nga ipatuman sa Department of Interior and Local Government ang maong kamanduan.
Kini tungod sa kasong misconduct ug dishonesty nga gipasaka ni Garcia batok kang Gica.
Si Gica nibahad sab nga mopasaka og kasong perjury batok kang Garcia.
Gibutyag ni Gica nga gitun-an sa iyang abogado kung angayan ba silang mopasaka og kasong administratiba o abuse of authority batok sa Deputy-Ombudsman.
Matud ni Gica nga ang Ombudsman wala’y authority sa pagluwat og order batok kaniya.
Giingong ang giluwatan nga order sa Deputy-Ombudsman imbalido tungod kay ang authority niini sa pagdisiplina sa mga public officials diha lang kutob sa low-ranking public officials ug dunay salary grade 25 paubos.
Si Gica nagkanayon nga dihang gipasakaan siya og kaso ni Garcia salary grade 25 siya tungod kay siya man ang bise mayor apan niadtong tuig 2016 napili siyang mayor sa lungsod ug nalakip na siya sa salary grade 27 o usa na ka high-ranking public official. (BANAT NEWS)
- Latest
