GICA mokiha ni Garcia

CEBU, Philippines - Nibahad si Dumanjug Mayor Efren Guntrano Gica nga mopasaka og kasong perjury batok ni kanhi mayor Nelson Gamaliel Garcia.

Si Gica nipasangil kang Garcia nga maoy ni-peke sa mga dokumento sa iyang pangangkon nga wala siyay laing kasong administratiba nga giatubang.

Si Gica nakakuha og certification nga pending pa sa hunta probinsiyal ang gipasakang kasong administratiba ni Garcia batok kaniya ug niduso na usab si Garcia og laing kasong administratiba batok kaniya sa Ombudsman.

Sa iyang bahin, si Garcia nagkanayon nga siya maoy angayang mopasaka og perjury batok kang Gica tungod kay ang gipanulti niini pulos bakak ug nipadala pa gyud og mga peke nga resibo.

“Ang iya ba to save face kay iyang ipagawas nga ako maoy sad-an nga ka klaro niyang sad-an,” matud ni Garcia.

Matud ni Garcia nga ang Ombudsman dili magpataka og desisyon nga dili magpahigayon og imbestigasyon.

“He should respect the decision of the Ombudsman kay mga tarong man ning mga tawo sa Ombudsman wala man ni sila’y political agenda ang Ombudsman,” matud ni Garcia.

Gani gibutyag ni Garcia nga ang Ombudsman nipadala og suwat kaniya ug nag-awhag nga mopasaka og kasong administratiba batok kang Gica hinungdan nga ang gisang-at sa hunta probinsiyal iyang gi-withdraw tungod kay wala kini hatagi og pagtagad.

Ang buhatan sa Ombudsman bag-o lang nipalagpot kang Gica sa serbisyo tungod sa giingong pagpaburot sa kantidad sa gasto sa ilang panihapon uban sa mga opisyal sa barangay dihang nilingkod kini isip acting mayor niadtong Abril 11 hangtud Hunyo 11, 2014.

Giingong giilisan ni Gica ang original nga kantidad nga P11,435 ngadto sa P21,435.

Ang Department of Interior and Local Government aduna nay kamanduan sa pagpatuman sa dismissal ni Gica apan wala pa   nadawat sa mayor.

Hinoon si Gica nipahibawo nga morespeto siya sa balaud ug mokanaug siya kung i-serve sa DILG ang order. (BANAT NEWS)