Sokor Consul: Gangsters ug di mafia ang nia sa Sugbo

CEBU, Philippines - Mibisita ang South Korean Consul ug Police Attaché sa Consulate of the Republic of Korea in Cebu nga si Yongsang Lee sa buhatan ni Cebu City Acting Mayor Edgar Labella kagahapon. Kini aron paghatag og katin-awan mahitungod sa pamahayag ni Presidente Rodrigo Duterte nga adunay Korean Mafia sa Sugbo.

Mitawag kang Acting Mayor Labella si Consul ug Police Attaché Lee aron sultihan si Labella nga walay ingon niini sa Sugbo.

Matud niya mga Korean gangsters ang naa dinhi ug kabahin sa iyang trabaho ang pagpangita kanila.

Sumala pa niya sukad sa iyang pagkadestino dinhi niadtong Septiyembre 2014 anaa na sa 18 ka mga wanted nga Koreans ang iyang napa-deport tungod sa mga sala nga ilang nahimo sama sa estafa, murder ug physical injury.

Dugang niini, padayon usab silang nakig-alayon sa otoridad sa Pilipinas ug mitabang usab ang Korean Police ug Korean Community sa pagpangita niining Korean gangsters.

Gawas sa Sugbo gimonitor usab nila ang ubang lugar nga posibleng gitagoan sa mga Korean gangsters. Giangkon ni Lee nabalaka ang mga Korean community dinhi sa Sugbo gumikan sa pagdako sa isyu mahitungod niining Korean mafia.

Si Labella sa iyang bahin miingon nga mipasalig kaniya si Lee nga nagtamod sa Korean Laws ug Philippine Laws ang mga Koreanong manganhi dinhi sa Pilipinas.

Giawhag ni Labella si Lee nga dili magpanuko sa pagduol sa kapulisan kun duna’y mga gikinahanglan.

Nasayran nga sa Pilipinas kapin sa 200 mil ka mga Koreans ang naa karon sa nasud ug 25 mil niini ang nia karon sa Metro Cebu (BANAT NEWS)