Mga kapitan mihatag sa drug list sa PDEA-7

CEBU, Philippines - Unom na sa 80 ka mga kapitan sa barangay sa Dakbayan sa Sugbo ang bulontaryong miduso sa mga listahan sa mga drug personalities sa ilang barangay ngadto sa buhatan sa Philippine Drug Enforcement Agency -7 kagahapon  sa buntag.

Si PDEA-7 Regional director Yogi Filemon Ruiz midawat kagahapon sa mga lista   gikan sa kapitan sa Sawang Calero nga si Ariel Iburan ayha sab kini mibisita sa barangay hall sa   Calamba.

Sa Calamba nakaatubang ni Ruiz ang kapitan nga si Maria Yvonne Feleciano, kapitan Elmer Abella sa Duljo-Fatima ug kapitan Antonio Caruzca sa Pahina San Nicolas. Si Feliciano ug Caruzca parehos nga mihatag sa ilang mga lista ngadto ni Ruiz samtang si Abella giingong paingon pa sab mohatag.

Gawas sa maong mga barangay una na nga mihatag sa ilang mga lista ang barangay Tisa, Quiot ug Lahug.

Si Iburan miingon nga human naundang sa kapulisan ang ilang kampanya sa drugas ilang nabantayan mibalik ang problema sa drugas sa ilang dapit ug mga minor de edad na ang gigamit sa namaligya og drugas.

Sumala pa nga 57 ka mga pangalan ang naa sa listahan ni Ruiz ug nagbutang sab og mga barangay tanods sa duha ka mga kritikal nga dapit sa Sawang Calero 24- oras.

Si Ruiz miingon nga tanang mga pangalan nga iyang nadawat ilaha pa nga ipaubos sa balidasyon ug kun makompirmar kini ayha pa sila mohimo og operasyon.

Alang ni Ruiz nga makaalarma na kaayo ang impormasyon nga iyang nadawat kung ugaling mga minor na ang gigamit sa pagbaligya og shabu.

Mibahad si Ruiz nga bisan og mga minors pa ang nagbaligya og drugas basta makuhaan sila og shabu kung sila masikop ilaha gayud kini nga pasakaan og kaso.

Samtang si Feliciano miingon sab nga sa ilang barangay sa Calamba  mibalik usab ang problema sa drugas. Si Feliciano mihatag og 20 ka mga pangalan sa PDEA-7.

Si Abella sa iyang bahin miingon nga mohatag sab kini og pangalan o lista sa PDEA-7 aron malimpyo na sab ang iyang barangay.

Ang impormasyon sa mga kapitan gikompirma sab sa director sa Police Regional Office-7, Chief Supt. Noli Taliño kababin sa pagbalik sa problema sa drugas sa nagkadaiyang dapit human nahunong ang kampanya sa kapulisan. Alang  ni Taliño mas maayo gayod nga motabang ang mga barangay sa PDEA-7.

Samtang gipaabot pa ni Ruiz ang tubag sa mga opisyales sa Brgy Carreta bahin sa nadiskubrehan nila nga drug den sa luyo gyud sa barangay hall. (BANAT NEWS)