Sakyanan, pumpboat gipangayo sa LCPO
CEBU, Philippines - Lapu-Lapu City Police Office mangayo og dugang sakyanan ug pumpboat nga magamit alang sa ilang operasyon.
Nangayo niini ang kapolisan sa Lapu-Lapu isip kabahin sa ilang mga gipangsumiter sa tanang departamento sa kagamhanan sa maong dakbayan atol sa gipahigayong comprehensive development program meeting.
Sa gipahigayon nga tigom sa mga departamento sa Lapu-Lapu City Government, gipresentar nila ang ilang mga proposal, pagpalambo sa ilang katakos sa pagpangalagad pinaagi sa ilang mga kagamitan nga nagkinahanglan og pundo.
Matud pa ni PSSupt. Rommel Cabagnot, City Director sa LCPO nga bisan og wala na manginlabot ang kapolisan sa kampanya batok drugas, apan wala nila luagi ang paggukod sa uban pang mga kriminal.
Sumala pa niini nga nangayo sila og 11 ka sakyanan, 4 ka pumpboat nga magamit kun adunay alarma sa mga isla. Lakip nilang gipangayo ang 20 ka bisikleta alang sa tourist police.
Kining tanan, proposal pa lang ug nanghinaut nga mahatag sa umaabot nga panahon.
Si Engr. Perla Amar ang hepe sa City Planning Development Office nitug-an nga ang ilang gipahigayon kabahin sa budgeting alang sa unom ka tuig nilang plano.
Ang mga gipangayo sa mga departamento lakip ang LCPO, mag-agad kun adunay igong pundo. (BANAT NEWS)
- Latest
