PB Franco, 6 balik trabaho na

CEBU, Philippines - Nakabalik na kagahapon sa ilang tagsatagsa ka trabaho ang mga opisyal sa Lungsod sa Medellin ug usa ka abogado sa Kapitolyo kinsa gisuspenso og duha ka buwan sa Ombudsman.

Si Wendell Rossel, executive assistant ni Provincial Board Member Horacio Franco, nipahibawo kang Bise Gobernador Agnes Magpale, Provincial Secretary Pulchra Marie Acevedo ug mga departamento sa Kapitolyo nga napupos na ang suspensiyon sa bokal niadtong Pebrero 7.

Matud ni Rossel nga wala hinoon nitungha sa iyang buhatan si Franco kagahapon apan sa Lunes na kini motambong sa ilang sesyon.

Ang mga nasuspensong opisyal sa lungsod sa Medellin ang nanambong dayon sa sesyon sa unang adlaw sa ilang pagbalik sa trabaho kagahapon.

Sila mao si Bise Mayor Lee RJ Villapez, Konsehal Ricardo Ramirez, Juan Alfonso Lim, Joevenus Inot ug Leonardo Montilla.

Ang gipamulta sibo sa duha ka buwan nila nga sweldo mao sila si kanhi konsehal Raymond Olivar, Artemio Noynay, Conrado Mangubat ug Kendrick Allen Lim sanglit wala na sila sa pwesto.

Lakip sa nasuspenso mao si Atty. Ritche Capahi kinsa maoy nihatag og legal opinion sa mga opisyal sa lungsod nga pwedeng mapaguba ang panimaye sa usa ka Tirso Seares nga gitukod sa publiko nga karsada sa Barangay Kawit niadtong 2013. (BANAT NEWS)