Tulo ka bata nanglungkab og tindahan
CEBU, Philippines - Nasakpan sa mga barangay tanod ang tulo ka magsuong bata nga nanglungkab og tindahan sa Barangay Mulao sa Lungsod sa Compostela.
Sa tindahan mismo nga ilang gikawatan nasakpan sa mga tanod ang mga menor de edad diin usa kanila babaye ug duha mga lalaki nga nagpuyo ra sab sa dapit.
Gilungkab nila ang Gabby Store nga gipanag-iya ni Viola Yangga, diin mokabat sa P1,497 nga balor sa nagkadaiyang baligya ang gikuha ug usa ka cellphone loader nga adunay P700 nga load.
Sa gibuhat nga pakisusi sa kapolisan sa Compostela nasayran nga ang batang babaye maoy nikatkat sa bungbong sa tindahan ug nilusot sa kisame aron makasulod.
Matud sa mga bata, nabuhat nila ang maong krimen tungod sa ilang kagutom.
Gidala sila sa Women and Children’s Protection Desk ug gi-turn over sa Local Social Welfare Development Office alang sa diversion program. Jomari Fernandez (BANAT NEWS)
- Latest