Gugma sa panahi

CEBU, Philippines - Sa iyang linghod nga panuigon, na-expose na siya sa nagkadaiyang klase sa panahi kay kanunay man siyang dad-on sa iyang inahan kun kini adunay tahion hinungdan nga mitatak sa iyang alimpatakan ang matag dagan sa makina ug kun asa itisok ang dinagom ngadto sa panapton.

Wala’y pormal nga training sa panahi ang 31- anyos ug gradwado sa Bachelor of Science in Information Technology ug Diploma in Associate in Computer Technology nga si Shiella Franciso, apan iyang natupngan ug basin nalabwan na ang mga maayong mananahi dinhi sa Sugbo.

Gani dihang nitungha siya og dressmaking nga libreng gitanyag sa Department of Manpower Development and Placement sa dakbayan sa Sugbo, imbis nga siya maoy tudloan, siya na hinuon ang nanudlo sa iyang mga ka-batch kun unsaon pagpanahi human makita sa iyang instructor ang iyang katakos.

“Ako na noon nagtudlo sa akong batch,” asoy pa ni Shiella dihang iyang gilab-as ang maong kasinatian dinhi sa Banat News Tingusbawan.

Giangkon niini nga naimpluwensiya gyud siya sa iyang inahan nga si Fernanda, lumad nga taga Argao kinsa usa sab ka magtutudlo og dressmaking kaniadto sa Sampaguita Vocation School niadtong tuig 1970s.

Dungan niini, matud ni Shiella nga bisan sa ka busy sa iyang inahan sa pagtudlo, nanahi usab kini sa nagkadaiyang boutique sa Sugbo kaniadto hangtud nga nakabaton kini’g iyang kaugalingong boutique niadtong tuig 1995.

Sa maong ginagmay nga negosyo nga inabagan sa iyang amahan nga si Rolando, nakalampos si Shiella sa iyang pagtungha gikan sa elementarya, hayiskul ug kolehiyo ingon man ang iyang mga igsuon, diin siya maoy kamanghuran sa upat ka magsuong babaye.

Dugang ni Shiella nga sa edad nga 5-anyos makita na niya kun unsaon ang paghimo og bisan unsa nga klase sa senina.

Gikan sa paghimo og pattern, pagtabas sa panapton, pagtahi ngadto na sa pagsukod sa nanag-iya niini.

Sa maong mga eksena nga nakita sa linghod niyang mata ug lantip nga pangisip, nagsugod og pitik ang iyang dughan alang sa pagpanahi.

Nunot niini, kapin sa duha ka tuig na ang nakalabay, iyang gibiyaan ang iyang mga “white collared jobs” sama sa business administration office, sales ug ingon man managerial nga trabaho aron tukuron ang iyang kaugalingong boutique nga “Fixin Clothes and Alteration Shop” nga adunay receiving center sa may Brgy. Basak, Cebu City.

Iyang giangkon nga wala siya magdahum nga mosangpot ang iyang desisyon sa pagtukod og kaugalingong boutique nga unta usa lamang kini ka hobby alang niya ang paghimo og senina.

Sa unang tuig sa iyang negosyo, nagsugod una siya og alteration o pag-repair sa mga nagkadaiyang senina gikan sa mga gown, long sleeves, karsones ug uban pa uban sa iyang inahan ug mga kailang mananahi.

Matud niya nga bahalag gamay ang income, basta kanunay. Gani sa ilang pagsugod, mag-house-to-house sila sa ilang mga customer aron sigurado gyud nga maila ang tahionon o i-alter man nga mga senina. 

Pagkakaron, gawas sa ilang pisikal nga boutique, mahimong matawagan o ma-text si Shiella human niya makita ang kaimportante sa pakiglambigit ngadto sa iyang mga customer mapa suki man o dili pa. Diin pinaagi niini, dali siyang masampit sa panahon nga adunay mga kausaban o hangyo ang iyang mga customer.

Sa pagsugod sab sa ilang boutique, tindak-tindak pa ang ilang makina hangtud nga karon, gagamit na sila og high-speed sewing machines.

Gawas nga sila modawat og mga nagkadaiyang panahi sama sa uniforms, gowns ug uban pang kasagarang senina, mohimo usab ang Fixin Clothes og nagkadaiyang costume nga gustong ipabuhat sa mga customer.

Nahimong hanas si Shiella sa paghimo og costumes kay kaniadtong nagtungha pa siya sa kolehiyo, siya maoy sangunan sa iyang mga klasmit ug magtutudlo sa paghimo og costume sa ilang stage plays human nila makita ang iyang katakos pagpanahi.

Gibutyag ni Shiella nga inanay ang pagdaku sa ilang boutique ilabi na nga wala pa kaayo sila’y customer kaniadto ug walay nakaila kanila.

Apan sa ilang pagkugi, nagbunga ang ilang mga paningkamot diin karon, modumdum na kanila ang mga suking customer. Gani aduna na siya’y mga order gawas sa nasud.

Malipayon si Shiella kay gawas nga natuman ang iyang passion sa panahi, iyang napadayon ang legasiya sa iyang inahan nga kaniadto igo rang magdala-dala kaniya kun asa kini manahi ug maoy nagtudlo kaniya sa paghigugma sa panahi. (BANAT NEWS)