“Tukhang for ransom” dugay nang gihimo sa kapolisan?

CEBU, Philippines - Alang kang Senador Panfilo Lacson, ang nahitabong pagdagit ug pagpatay kang South Korean businessman Jee Ick Joo dili usa ka isolated case.

Sa taho sa interaksyon.com, una  nang gipamulong ni Lacson nga ang ubang kurap nga sakop sa Philippine National Police, gihimong gatasan ang "Oplan Tukhang" isip cover-up alang sa kidnap for ransom nga mga kalihukan. Aron pagpa-matuod niini, gipresentar ni Lacson sa Senado niadtong Huwebes ang CCTV footage sa gihimong pagpangronda sa kapolisan sa usa ka opisina niadtong Oktubre sa miaging tuig diin ilang gitapok ang tanang empleyado sa usa ka kwarto ug giplanteran og ilegal drugs ang mga drawer.

Ang Senate Committee on Public Order and Dangerous Drugs diin si Lacson maoy tsirman, nagsugod na sa ilang pagsusi sa “tukhang for ransom” diin ang negosyanteng Koreano nga si Jee gidagit ug gipatay sa sulod mismo sa Campo Crame, sa mga polis.

Niadtong Biyernes, si National Capital Region Police Office director PCSupt. Oscar Albayalde nikumpirmar sa gipakitang video ni Lacson. Matud niini nga ang maong krimen, gihimo sa mga sakop sa Anti-Illegal Drugs Group (AIDG) sa Metro Manila diin gipangrelibo na sa pwesto ang maong mga polis ug gikustodiya na ug gimando na ni PNP chief Ronald Dela Rosa ang paghimo sa imbestigasyon.

Giangkon niini nga ang maong binuhatan nahimo sab sa mga miaging administrasyon ug niingon nga “There will always be scalawags in uniform kaya nga ngayon, we really have to be serious in our internal cleansing.”

Usa sa mga rason kun nganong way kahadlok ang ubang polis matud ni   Albayalde, gumikan kini sa kahinay sa proseso sa pagtangtang nila sa katungdanan ug ingon man ang posibilidad nga dili sila matangtang gumikan sa mga kaila niini nga adunay impluwensiya. (Dennis Tanoc)

Malacañang: Duterte, tawo lang sab

Gipanalipdan na sab sa Malacañang si Presidente Rodrigo Duterte pinaagi sa pag-ingon nga hatagan kini og “allowance for mistakes” kay siya tawo lamang ug masuko kun kini sawayon bisan pa man sa iyang paningkamot.

Sa taho sa philstar.com giinsulto ug gi-atake na sab ni Duterte ang simbahang katoliko human ang mga obispo nakapuntos sa giingong extrajudicial killings nga nalambigit sa iyang brutal nga pakigbatok sa illegal drugs.

Gibutyag sa presidente nga ang mga kaparian walay katungod nga siya sawayon kay labaw sab silang sawayonon kay ang uban kanila nalambigit sa kurapsyon, mga immoral ug mga hugawan.

Gihagit sab ni Duterte ang mga obispo sa pag-resign kun ang  iyang mga alegasyon mapamatud-an nga tinuod.

Si Presidential Communications Assistant Secretary Ana Maria Banaag niasoy kun nganong grabe ang kasuko sa presidente sa kaparian ug niingon kini nga sama sa ordinaryong tawo, masuko sab kini kun sawayon.

“Tao din lang naman ang ating presidente ‘di ba. He is a working president. He works hard, he gets tired. Sometimes he gets annoyed,” matud ni Banaag.

“But at the end of the day, sana we can give our president also allowance for mistakes. Kung may pagkukulang man siya sa pananalita at least nagta-trabaho naman siya,” dugang niini.

Ang mga tirada ni Duterte batok sa simbahang katoliko nahitabo pipila ka adlaw sa wala pa magsugod sa ilang plenary assembly ang Catholic Bishops Conference of the Philippines (CBCP) diin gilauman nga tukion sa mga obispo ang extrajudicial killings ingon man ang federalismo ug death penalty nga giduso ni Duterte.

Matud ni Banaag nga dili manghilabot ang Malacañan sa mga himoong lakang sa kongreso ug iyang gihimug-atan nga ang Duterte administration wala mag-endorso sa EJKs.

“EJK’s are not state-sponsored…. Perhaps they (CBCP) might suggest solutions on how to go about the problem and help the government before they make judgments about all these EJKs and attribute it to the president or the administration,” asoy ni Banaag.

“Perhaps it would be better if we help each other or perhaps give suggestion on what to do with the problem then maybe it’s best to talk… rather than (to argue on) who’s right or who’s wrong.” (BANAT NEWS)