Nanguha’g ubod sa lubi nakuryentihan patay
Ang biktima mao si Ricky Mabano, residente sa Brgy. Olango, Aloguinsan.
Nigawas sa imbestigasyon nila ni Senior Police Officer 2 Emelio Relasan nga nanguha og ubod sa lubi si Mabano ug iyang igsuon nga si Jerome diha sa ilang dapit.
Apan sa wala damha, ang giputol nilang udlot sa lubi natumba padung sa primary line sa CEBECO III nga adunay 7,620 Volts nga kuryente.
Tungod niini, maayong pagkapilit ni Mabano sa ibabaw nga bahin ug nakaangkon og grabeng kadaot sa kalawasan.
Tungod sa kapeligro, way nahimo ang iyang igsuon ug ang mga tawo sa lugar kondili ang pagpalayo ug nanawag sa kapolisan ug sa CEBECO III aron makuha si Mabano sa ibabaw.
Ang mga linemen sa CEBECO III daling mipawong sa linya sa kuryente ug maoy nikuha sa iyaha gikan sa pagkasangit.
Daling gidala sa mga kabanay ug mga polis si Mabano ngadto sa Pinamungajan District Hospital apan pag-abot didto gideklarar siya nga patay nang daan. (Gikan sa The Freeman/EIM)
Nipalusot og cellphone sa MCJ nadakpan
Magsilbi unta kini nga leksyon sa mga nagtinguha sa pagpalusot og ginadiling butang sa sulod sa Mandaue City Jail human usa ka babaye ang nadakpan tungod sa pagdala og cellphone nga gipapilit og masking tape sa iyang bukton.
Kini ang gipadayag ni Bise Mayor Carlo Fortuna sa nahitabo ni Thelma Jopia, 50 , nga nadakpan ni JO1 Maria Lyra Bandoquillo niadtong miaging Sabado sa buntag sa gihimong pagrekisa sa pagbisita niini sa maong bilanggoan.
Si Jopia nga taga Brgy Casili sa Dakbayan sa Mandaue moduaw unta sa iyang bana nga napriso sa lugar apan nadiskubrehan ni JO1 Bandoquillo ang cellphone nga gipapilitan og masking tape sa bukton niini.
Matud pa ni Bandoquillo nga si Jopia ang nakalapas sa City Ordinance No. 13-2014-907 nga nagdili sa paggamit o pagdala og cellphone o uban pang electronic communication devices sa sulod sa Mandaue City Jail.
Ang makalapas niini mahimong mabalhog sa bilanggoan o makabayad og multa nga P5,000. (BANAT NEWS)
- Latest
