Pangisip sa mga sikyu pirme ipa-monitor

CEBU, Philippines - Giawhag sa hunta probinsyal ang tanang security agencies sa Lalawigan sa Sugbo nga istriktuhon ang pagpatuman sa ilang lagda ug rekisitos alang sa mga mo-apply og security guards.

Kini sama sa pagpaubos sa mga aplikante sa neuro-psychiatric examination ug kun madawat kinahanglang periodic ang paghatag sa maong exam aron ma-monitor ang ilang mental health.

Ang panawagan pinaagi sa resolusyon nga gipangamahanan ni Bokal Thadeo Jovito Ouano nunot sa nahitabong pagpamusil nga naglambigit sa mga security guards.

Base sa Republic Act No. 5487, walay private security guard, security officer, security consultants, private detective ug government security personnel nga hatagan og lisensya gawas kun kini physically ug mentally fit. Dugang sa resolusyon ni Ouano nga subay sa maong balaud, ang mga bag-ong aplikante kinahanglan mokuha og neuro-psychiatric test clearance ug i-file ang ilang application sa Firearms, Explosives, Security Agencies and Guards Sections (FESAGS) ug  Regional Operation and Plans Division (ROPD) kung asa nga Police Regional Office. (BANAT NEWS)