Privatization sa pagkolekta sa basura OK ni Cabañero

CEBU, Philippines - Dili supak ang pangulo sa Association of Barangay Council (ABC) sa Siyudad sa Talisay nga i-privatize ang pagkolekta sa basura sa maong dakbayan.

Nakita ni Talisay ABC President Raul Cabañero nga grabe na gyud ang problema sa basura sa matag barangay sa ilang siyudad. Gawas niini matud ni Cabañero nga makadaginot pa ang barangay sa gastohan kay dili na man sila maggahin og budget alang sa ilang maintenance sa ilang mga garbage truck. Kini nagkanayon nga kinahanglan gyud nga seryosohon ang problema sa basura ug kinahanglan sa tanang kooperasyon.

 Sa pagkakaron, ang Talisay adunay 10 ka garbage truck apan upat lang niini ang nagdagan. Gani gitug-an ni Cabañero nga aduna say mga barangay nga wala gyuy garbage truck ug nagsalig lang sa siyudad.

 Ang pangulo sa Solid Waste Management nga si Edwin Nierves nibutyag nga dakung tabang ang pagbutang og Barangay Enviromental Officer  sa kabarangayan aron maoy mosikop sa mga tawo nga magpataka og labay sa basura. Apan gibaraw kini ni Cabañero kay nag-usik-usik lang kini sa pundo sa barangay alang sa ilang sweldo.

Sigon sa kapitan nga trabaho sa mga kapitan ang basura ug kinahanglan nga gamiton gyud ang ilang political will.

Dugang pa niya nga nindot na ang balaud busa angay kini nga iimplementar. Hinuon iyang gipasabot nga kinahanglan gyud kaayo ang pag-edukar sa katawhan kay diha man magsugod sa isig kaugalingon ang kalimpyo. (BANAT NEWS)