Tulo gipamusil, managsuon patay

CEBU, Philippines - Patay ang duha ka managsuon ug kritikal ang kahimtang sa ilang usa ka silingan human sila gipamusil samtang nagtagay diha sa Sitio Sta. Cruz, Upper Inayawan ning Dakbayan sa Sugbo pasado alas-12 kagahapon sa kaadlawon.

Dead on the spot si Noel Raganas Dela Rosa, 32, human nakaangkon og samad pinusilan sa ulo ug kilid sa lawas samtang nakabsan sulod sa tambalanan ang iyang magulang nga si Pepito, 38, nga nakaangkon og samad pinusilan sa liog ug kilid sa lawas ug kritikal usab ang kahimtang sa ilang higala nga si Juphil Cañada, 33, nga dunay samad pinusilan sa ulo.

Si Police Officer 3 Winston Ybañez, imbestigador sa Homicide Section sa Cebu City Police Office nga nahinabi sa Banat News miingon nga personal nga bikil ang gitan-aw nilang motibo sa pagpamusil.

“Wala nato gi-discount ang possibility nga nakakita sila og bikil unya gibaslan pero gisubay pa nato ang record aning tulo… walay nakakita sa gunman kay ngitngit sa area,” matud pa ni Ybañez.

Matud pa ni Ybañez nga sa nakuha nila nga impormasyon unang nagtagay ang tulo ka biktima sa lain nga dapit apan sa dihang kini nakulangan subli kini nga nagtagay diha sa usa ka guba nga balay nga nagsilbing tambayanan sa mga tawo nga naa sa ngitngit nga dapit.

Ang mga tawo nga nagpuyo sa maong lugar mitug-an sa mga polis nga tunga-tunga sa gabii ilaha na lang nadungog ang lima ka buto sa armas ug sa ilang pagsubay nangligdas na sa yuta ang tulo ka mga biktima. Ang duha ka magsuon gidala sa Cebu City Medical Center (CCMC) apan nakabsan gayud sa kinabuhi samtang kritikal usab sulod sa Vicente Sotto Memorial Medical Center (VSMMC) ang ilang silingan. Sa crime scene narekober sa mga polis ang lima ka basiyo sa .45 caliber pistol ug usa ka slug. (BANAT NEWS)