Magpale, Bercede, Sybico way palta sa sesyon
CEBU, Philippines - Tulo ka sakop sa hunta probinsiyal ang walay palta sa pagtambong sa sesyon gikan sa buwan sa Hulyo hangtud Disyembre 2016.
Sila mao si Bokal Miguel Antonio Magpale, Glenn Bercede ug Jude Thaddeus Durano Sybico kinsa nakatambong sa 23 ka sesyon sa unang unom ka buwan sa kasamtangang termino.
Lima ka sakop ang adunay tagsa ka palta tungod kay official business (OB) ug on-leave sama nilang Bise Gobernador Agnes Magpale (OB), Bokal Jose Mari “Tata” Salvador (OB), Edsel Galeos (on-leave), Sun Shimura (OB) ug Bokal Thadeo Jovito “Jonkie” Ouano dunay (absent).
Si Bokal Christopher Baricuatro nakatambong og 21 ka sesyon ug duha ka OB, Raul Bacaltos may 21 ka sesyon ug dunay usa ka adlaw nga absent ug usa ka adlaw nga on-leave.
Sila si Bokal Jerome Christian Librando, Yolanda Daan ug Victoria Corominas-Toribio parehong nakatambong og 20 ka sesyon.
Si Librando dunay duha ka OB ug usa ka leave, si Daan dunay duha ka OB ug usa ka leave ug si Toribio dunay duha ka absent ug usa ka OB. Si Bokal Horacio Franco nakatambong og 18 ka sesyon diin duna siya’y usa ka absent, duha ka OB ug usa ka leave.
Si Franco wala na katambong sa sesyon niadtong Disyembre 19, 2016 tungod sa suspension order sa kaso dihang konsehal pa siya sa Lungsod sa Medellin.
Si Bokal Alex Binghay nakatambong og 17 ka sesyon diin duna siya’y tulo ka OB ug tulo ka leave.
Si Bokal Earl Tidy Oyas nakatambong og 15 ka sesyon diin duna siya’y usa ka OB. Nilingkod si Oyas human siya napili nga pangulo sa Philippines Councilors League niadtong Agosto 22, 2016.
Si Bokal Celestino Martinez III nakatambong lang kini og lima ka sesyon diin dunay usa ka absent ug duha ka leave. Si Martinez gitangtang sa katungdanan tungod sa kasong graft apan nabalik niadtong Disyembre 5. – BANAT NEWS
- Latest
