Bag-ong landfill sa Aloguinsan gireklamo

CEBU, Philippines - Ang mga residente sa Barangay Tampaan sa Lungsod sa Aloguinsan mireklamo sa giingong kabaho sa basura nga moagi sa ilang lugar paingon ngadto sa pribadong sanitary landfill sa Barangay Punay.

Ang Barangay Punay nga nahimutang  sa 20 ka ektaryang sanitary landfill tupad lang kini sa Barangay Tampaan.

Base sa report, ang nahisgutang mga residente mireklamo kay giingong adunay mga nasakit nilang silingan tungod sa paghanggap sa baho sa basura.

Ang mga basura gikan sa dakbayan sa Sugbo giingong anha ilabay sa maong landfill.

Si Mayor Augusto Cesar Moreno nagkanayon nga ang nahisgutang pribadong sanitary landfill nahimutang sa nahisgutang barangay ug niadtong Enero 7, 2017 pa lang kini nagsugod sa pag-operate.

Gikwestiyon ni Moreno kun nganong nasakit dayon ang mga tawo nga sukad kagahapon walo ka adlaw pa man ang pag-operate sa maong landfill.

Matud sa mayor nga niining ulahi lang adunay opisyal sa Barangay Tampaan ang mibisita kaniya apan wala kini maghisgot nga adunay nasakit sa iyang barangay tungod sa kabaho sa basura.

Gibutyag ni Moreno nga ang maong pribadong landfill aduna na kini endorsement sa lungsod.

Ang maong pribadong labayanan og basura giingong duna kini mayor’s permit ug Environmental Compliance Certificate (ECC) gikan sa Department of Environment and Natural Resources (DENR).

Dugang ni Moreno nga mga duha ka kilometro ang gilay-on sa landfill gikan sa kabalayan.

Walay gihisgutan ang mayor   kun mopahigayon ba siya og imbestigasyon sa maong insidente.

Hinuon buot niya nga matuman sa management sa landfill ang tanang nakalatid sa balaod ug sa ECC sa pag-operate sa landfill.

Tumong niini nga dili maapektohan ang panglawas sa mga residente sa maong lugar. (BANAT NEWS)