Ang sinugdanan sa prosesyon ni Sr. Sto. Niño

CEBU, Philippines – Hugopan sa daghang deboto ang prosesyon ni Senyor Santo Niño nga himoon matag bisperas sa iyang kapistahan kada tuig diin magbitbit og imahe sa Balaang Bata. Gani nahimo nang panaad sa uban nga mouban gyud sa maong kalihukan taliwala sa bisan unsa nga kakulian. Kay ang maong panaad nahimo mang bugti sa mga natubag nga pag-ampo ug sa grasyang nadawat sa usa ka deboto.

Adunay karaang istorya diin matud pa sa katigulangan nga kun mag-eklipse ang buwan, giingong gitukob kini sa daku kaayo nga bitin o ang ilang gitawag nga bakunawa.

Sa kahadlok nga hingpit nga mahanaw ang buwan, ang mga karaang tawo kaniadto magdukdok sa ilang mga agong ug tambol aron abugon ang maong bakunawa nga nagtangag sa buwan.

Di gyud nila hunongon sa pagbasal ang ilang mga tambol ug agong hangtud nga dili nila makita og balik ang buwan nga gitukob.

Dihang makita na nila og balik ang buwan sa kalangitan, magsadya sila ug magpasalamat sa paghibalik niini gikan sa pagtukob sa bakunawa.

Ang maong pasalamat sagad himoon sa sunod nga takdol sa buwan ug nabatasan na kini nila.

Adunay higayon nga usa ka eklipse nga nabuntagan na lang ang mga ginsakpan ni Haring Humabon tungod sa kadugay nga nahibalik ang buwan.

Samtang sila nagpaabot nga iluwa sa bakunawa ang buwan walay hunong nilang gibasal ang ilang mga tambol ug agong. Apan mikalit lang og bundak ang kusog kaayo nga ulan ug nabasa silang tanan. Pun-an pa sa paghaguros sa kusog kaayo nga hangin.

Bisan pa man niini, wala gihapon nila biya-i ang ilang nahimutangan hangtud nga wala nila makita ang buwan.

Tungod sa ilang nahiaguman, nasakit ang maong mga tawo nga maoy hinungdan nga dili na sila makapahigayon og pasalamat sa sunod nga takdol. Lakip sa nasakit mao si Haring Humabon mismo ug bugtong ang iyang asawa nga si Rayna Juana lang ang wala masakit.

Matud pa nga ang palasyo ni Humabon napuno sa mga nasakit apan ang uban anaa ra sa ilang mga balay. Mao nga ang mga tawo nangadto sa palasyo aron matambalan, apan adunay uban nga dili makaadto sa palasyo hinungdan nga nabalaka ang Rayna.

Gumikan sa maong sitwasyon, nagpinsar siya og maayo kun unsaon nga maayo ang mga masakiton aron madayon ang pagpahigayon nila sa pasalamat.

Nahuna-hunaan sa rayna nga kuhaon ang Santo Niño nga anaa sa altar ug iya kining gilibot sa palasyo.

Dungan sa iyang pagsuroy iya sab nga gidat-ol ang imahe sa Balaang Bata sa agtang sa mga masakiton.

Ang mga gidat-olan sa imahen, milagroso nga naayo ug tungod niini sila nanindog ug misunod sa rayna bisan asa kini muadto.

Matud pa nga si Rayna Juana mikanaug sa palasyo ug misuroy sa kabalayan samtang nagsunod kaniya kadtong mga tawo nga naayo.

Nagkadugay, nagkataas ang linya sa misunod sa rayna kay nagkadaghan man sab ang nangaayo sa ilang sakit.

Ug tungod sa ilang pagkaayo, napahigayon gyud nila ang pagpasalamat sa pagtakdol sa bulan.

Kadtong ilang gibuhat mao ang unang pagpahigayon og prosesyon alang kang Senyor Santo Niño nga gituohang maoy nagpaayo sa ilang sakit. (BANAT NEWS)