13 anyos nangluod, naghikog

CEBU, Philippines - Patay na nga nakita sa usa ka amahan ang 13 anyos niyang anak lalaki human kini naghikog sulod sa ilang balay gumikan sa pagpangluod kay wala hatagi og P18 nga pangbayad sa pagdula og computer.

Ang 13 anyos nagtungha sa grade 5 ug nagpuyo sa Sugar Landia sa Barangay Bacayan sa dakbayan sa Sugbo.

Ang imbestigador sa homicide section sa Cebu City Police Office nga si PO3 Winston Ybañez niingon nga ang amahan mismo sa biktima ang nakakita sa nahitabo sa iyang anak kun diin nagbitay ang bata sa ilang balay gamit ang pisi nga gihikot sa ilang atop ug sa liog pasado alas 5 niadtong nakalabay nga hapon. Sumala pa ni PO3 Ybañez nga sa wala pa naghikog ang batan-on nangayo kini og P18 sa iyang inahan aron idula og computer apan kini gibalibaran.

Human gibalibaran mipaingon sa iyang higdaanan ang 13 anyos ug pagkataud-taud nakita na lang sa amahan ang nahitabo sa iyang anak.

Sulay pa unta nga gitabang ang biktima apan nakabsan gyud kini sa iyang gininhawa. (BANAT NEWS)