Langub ibida sa Tribu Katbalaugan

CEBU, Philippines - Sa ikatulo nga higayon, gitinguha sa Tribu Katbalaugan sa Catbalogan City sa Lalawigan sa Samar nga masakmit ang kampiyonato sa umaabot nga Sinulog Grand Parade.

Karong Domingo ipakita sa grupo ang ilang turismo pinaagi sa pag-promote sa bag-o nilang nadiskobrehan nga langub.

Matod sa assistant choreographer niini nga si Budie Manubag nga adunay nadiskubrehan nga langub ang LGU sa Brgy. Payao. Diin  magbase ang ilang istorya sa mga kabog nga nagpuyo sa maong langob apan adunay mangangayam nga modisturbo sa ilang pagpuyo.

Ang ilang sayaw mopakita sa paghangyo ug pagpasalamat kang Sr. Sto. Niño nga panalipdan ang maong langob.

Giangkon ni Manubag nga dili lalim ang ilang giagian sa pagpraktis. Gawas nga kanunay mag-ulan, nahimo usab nila nga problema ang ilang propsmen nga tulo ka adlaw ra nakapraktis kay pulos kini mga estudyante sama sa ilang mga dancers.

Dugay sab silang nakaanhi sa Sugbo gumikan sa bagyong Auring. Ang Tribu Katbalaugan, adunay 96 ka dancers, 300 ka propsmen ug 50 ka drummers.

Butyag ni Manubag nga naporma na ang ilang sayaw ug nanghinaot sila nga makuha ang kampiyonato karon human nila nakuha ang ikaduhang ganti sa miaging tuig. (BANAT NEWS)